Анимираниот филм „Детето фантом“ во Кинотека
- Во рамки на седмата серија од „Џифони филмски денови“ денеска во просториите на Кинотека учениците ќе имаат можност да го гледаат анимираниот француски филм за деца „Детето фантом“.

Скопје, 28 мај 2022 (МИА) – Во рамки на седмата серија од „Џифони филмски денови“ денеска во просториите на Кинотека учениците ќе имаат можност да го гледаат анимираниот француски филм за деца „Детето фантом“.
Продукцијата на филмот е од 2015 година во режија на Жан-Луп Фелисиоли и Алан Гањол, и истиот ќе биде синхронизиран на македонски јазик.
-Детето фантом е всушност Лео, 11-годишно момче од Њуjорк, кое е суперхерој. Лео е во болница и страда од сериозна болест, но дознава дека може да го напушта телото и да лета низ градот, да поминува низ ѕидови како фантом. Се спријателува со Алекс, полицаец, кој привремено е во инвалидска количка. Принудени се да внимаваат на Мари, своеглава новинарка, која тргнува во потрага по злосторникот, а во која Алекс е тајно вљубен. Тие тројца треба да го спасат градот од лошиот и криминален шеф, се наведува во соопштението на Џифони Македонија.
Како што е најавено, по дискусијата на филмот ќе се одржи „Филмска работилница“ со режисерката Марија Џиџева, за сите оние што сакаат да снимаат филмови и видеа.
„Џифони филмски денови“ е програма што привлекува големо внимание кај учениците што ја сакаат филмската уметност. После секоја проекција, следува дебата во која активно се учествува. Деновите се отворени за ученици од основно образование, а по проекцијата на филмот ќе следува дискусија.
Проектот „Џифони филмски денови“ се организира со поддршка на Делегацијата на ЕУ во Скопје, од Агенцијата за филм на РСМ и од Кинотеката на Северна Македонија, а се остварува во соработка со Амбасадата на Италија во Скопје и италијанскиот партнер „Џифони Експириенс“.бт/дма/