Велес, 27 декември 2024 (МИА) - Во организација на Сојуз на спортови на Велес, со поддршка на Општина Велес, синоќа свечено беа наградени најдобрите спортисти и екипи од спортот во Велес за 2024 година, кои традиционално ги доделува Сојузот на спортови на Велес.

Признанија и плакети добија клубови, поединци, тренери, судии, манифестации, звучни имиња кои се запишале меѓу најдобрите во Велес, Македонија,  Европа и светот. За најдобар од сите во 2024 година и Спортист на Велес за 2024 година  беше прогласен и пехарот го доби  велешкиот кајакар и македонски репрезентативец Ангел Петрушев член на ККК „Вардар“ од Велес.

Како што истакнаа на свеченоста  од Сојузот на спортови на Велес, Ангел Петрушев  со своите достигнувања е велешка гордост за која уште многу ќе се зборува.

Ангел Петрушев е државен првак во кајак слалом на диви води, победник на ИКАС 2024, 19 место на Светскиот куп во Краков Полска,16 место во кајак Крос на Светското првенство У23 во Словачка.

Ангел Петрушев го освои 6-то место на Европското првенство во Љубљана, Словенија. Со овој успех се стекна со титула „Спортист од меѓународна категорија“ добиена од Министерството за спорт.

На синоќешната свеченост постхумно признание му беше доделено на велешката спортска легенда Ристе Велковски ракометар за неговиот придонс во спортот. ад/дма/

Фото: МИА