Вашингтон, 14 февруари 2025 (МИА) - Американската влада синоќа почна да отпушта илјадници вработени во различни владини агенции додека претседателот Доналд Трамп и Илон Маск ја забрзаа „чистката“ од федералната бирократија, јавија американски медиуми повикувајќи се на синдикални извори и вработени.

Одделот за прашања на ветераните, што обезбедува здравствена заштита за ветераните, соопшти дека отпуштил повеќе од 1.000 вработени кои биле на условна казна, а Шумската служба на САД се очекува да отпушти повеќе од 3.000 луѓе.

Во последните 48 часа се испратени мејлови за престанок на работни односи на вработени низ државната администрација, главно неодамна ангажирани. Тие вклучуваат вработени во Одделот за образование, Администрацијата за мали бизниси, Бирото за финансиска заштита на потрошувачите и Управата за општи услуги, што управува со бројни федерални згради.

Според владините податоци, пред помалку од две години биле ангажирани околу 280.000 цивилни државни службеници, а повеќето се уште се со привремени договори, што го олеснува отпуштањето.

Во меѓувреме, Национални шуми на САД се очекува да отпушти 3.400 пробно вработени на сите нивоа на агенцијата, објави Политико, повикувајќи се на извори кои истакнаа дека меѓу отпуштените нема да има пожарникари.

Во соопштението од Одделот за прашања на ветераните се вели дека отпуштањата „ќе му заштедат на одделот повеќе од 98 милиони долари годишно и ќе ги пренасочи сите тие ресурси назад кон здравствената заштита, придобивките и услугите на корисници на одделот“.

Сите вработени по договор во Канцеларијата за управување со човечки ресурси на американската влада биле отпуштени синоќа и во групен телефонски повик им било кажано да го напуштат седиштето на агенцијата во Вашингтон, соопштија два извора.

Кога започнаа отпуштањата, група од 14 американски држави поднесоа тужба до федералниот суд во Вашингтон, тврдејќи дека Трамп незаконски го назначил Маск, давајќи му „непроверено законско овластување“ без овластување од американскиот Конгрес. паг/

Фото: МИА архива