Белград, 8 април 2024 (МИА)- Правиме се што е во наша моќ Србија што поскоро да стане членка на Европската унија (ЕУ), таа е втора во светот според добиени парични средства од фондовите на ЕУ, но од политичката волја во Србија зависи кога ќе стане дел од Унијата, изјави амбасадорката на Шведска во Србија, Аника Бен Давид, јави дописникот на МИА од Белград.

-Србија донесе одлука и поднесе барање за членство во ЕУ и со тоа влезе во процесот, каде што ги прифаќате критериумите на тој процес кои мора да се исполнат за да се напредува во тој процес, изјави за денешна Политика Бен Дејвид и истакна дека Србија е втора во светот по износот на пари што ги добива од фондовите на ЕУ.

„Истовремено, Шведска од почетокот на 2000-тите дава годишно околу 13 милиони евра. Таа поддршка се состои во помагање на Србија да ги спроведе реформите за да ги исполни критериумите за прием во ЕУ“, објасни таа, додавајќи дека „не постои друг меѓународен играч што би ги понудил истите можности“.

На прашањето дали е загрижена дека конфликтот меѓу Русија и Украина може да се прошири и во Европа, Бен Дејвид рече дека не е загрижена, односно дека е убедена дека Украина ќе победи во оваа војна, а Русија ќе загуби.

-Затоа приоритет број еден е да се подржи Украина онолку долго колку што е потребно. Со влезот во НАТО, Шведска е побезбедна, а НАТО стана посилен. НАТО е алатка на демократијата, неагресивен сојуз, сојуз за мир и соработка, рече Бен Дејвид.

Како одговор на коментарот дека граѓаните на Србија немаше да се согласат со тоа ниту во 1999 година, Бен Дејвид објасни дека Шведска во тоа време не била членка на Алијансата, „но она што се случи тогаш беше последниот обид да се запре етничкото чистење во Косово и да се запрат конфликтите на Западен Балкан кои траеја долго време“. об/сд/