Куманово, 16 септември 2022 (МИА) - Граѓани, екипи на „Чистота и Зеленило“ и осудени лица од затворот Кшање денеска чистеа на локација на булеварот „Октомвриска револуција“. Претходно станарите се жалеа дека е нерасчистено и стравуваа од змии. - Интенцијата на граѓанската иницијатива е расчистувањето на јавните зелени површини да биде вметнато во годишниот план за работа на „Чистота и зеленило“, што пак значи редовно одржување. Планираме да продолжиме и понатаму на дел од „Октомвриска револуција“ месната заедница „Панче Пешев“, изјави Бобан Кипријановски од граѓанската иницијатива која ја иницираше акцијата. Жителите велат дека е потребно редовно одржување на површините, иако од одговорните им било посочено дека тоа е обврска на станбените домари, но земјиштето е сопственост на државата. - Ние граѓаните ќе организираме акции, но не можеме често. Овде треба редовно чистење, косење на тревата. Апелирам до општината и до „Чистота и Зеленило“ овде да постават корпи за отпадоци, бидејќи отпадоците што ги фрлаат децата, ние станарите ги собираме бидејќи нема корпи. Ова е урбана средина каде што живеат голем дел од кумановци, но не се одржуваат зелените површини. Станарите ќе достават и иницијатива до општината за поставување на детско катче кај комплексот згради, вели Кипријановски. Иницијаторите се заблагодарија на екипите од „Чистота и Зеленило“ од затвор Куманово за помошта во расчистувањето.ам/фф/