Тел Авив, 25 март 2024 (МИА) - Ниту една испорака на хуманитарна помош не стигнува до северниот дел на Појасот Газа и покрај итните предупредувања за глад за населението, соопшти денеска Агенцијата на Обединетите нации за помош и работа за палестинските бегалци на Блискиот Исток, цитирана од ДПА.

Изјавата уследи по вчерашните изјави на Агенцијата дека израелските власти ги информирале ОН дека „повеќе нема да дозволуваат нивни конвои со храна во северниот дел на Газа“, каде што, според шефот на Агенцијата, Филип Лазарини, луѓето се на работ на глад.

Агенцијата соопшти дека просечно 157 камиони со хуманитарна помош дневно влегувале во областа овој месец, заклучно со саботата. УНРВА потврди дека оттогаш Израел не дозволува камиони кои превезуваат итни резерви на храна во северниот дел на Газа.

Агенцијата во четвртокот поднела барања за одобрување за испорака на хуманитарна помош, но сите биле одбиени без причина.

Израел ги отфрли обвинувањата дека ја попречува испораката на хуманитарна помош во Појасот Газа и наместо тоа ги обвини хуманитарните агенции дека не ја дистрибуираат правилно. Самите организации најавија дека им недостига соодветна заштита. мс/

фото: МИА архива