Tetovë, 31 janar 2026 (MIA) - Kryeministri Hristijan Mickoski, ministrja e Arsimit dhe Shkencës Vesna Janevska, kryetari i Komunës së Tetovës Bilall Kasami dhe zyrtarë të tjerë shtetërorë morën pjesë në hapjen e dy objekteve të rindërtuara të Gjimnazit Kiril Pejçinoviq në Tetovë, i njohur në qytet si "Mjekësia e Vjetër". Dy ndërtesat e gjimnazit, të cilat janë mbi 100 vjeçare, janë rindërtuar që nga korriku i vitit 2025 me një donacion prej 800 mijë eurosh nga një kompani private.

"Sot jemi këtu për të promovuar këto dy ndërtesa, të cilat prej kohësh kanë qenë ikonë e qytetit të Tetovës, disa nga më të bukurat, për fat të keq të harruara prej kohësh dhe të "ngrëna nga shkatërrimet e kohës". Prandaj, më lejoni që në emër të të gjithë nxënësve, të gjithë qytetarëve të Tetovës, të shpreh mirënjohjen time të madhe për kryeministrin Mickoski, i cili personalisht u angazhua për sigurimin e këtij donacioni dhe rikthimin në jetë të këtyre dy ndërtesave, përsëri për nxënësit", tha kryetari i komunës Bilall Kasami.

Ministrja Janevska tha se ka investime të mëdha në arsim në Tetovë që do të kontribuojnë në një cilësi më të mirë të arsimit.

"Shpreh kënaqësi të madhe që sot pata mundësinë të shoh personalisht se nxënësit dhe mësuesit e Shkollës së Mesme "Kiril Pejçinoviq" po marrin kushte më moderne të punës në infrastrukturë, gjë që do të thotë sukses më i madh në punën e tyre. Falënderoj kompanitë me përgjegjësi shoqërore që, së bashku me kryeministrin, siguruan një donacion për të marrë këtë objekt të mrekullueshëm", tha Janevska.

Kryeministri Mickoski theksoi se shpreson që të zbatohen projekte të tjera të suksesshme. Ai u uroi nxënësve dhe mësuesve që do të mësojnë dhe punojnë në ato ambiente shumë dituri dhe suksese në punën dhe studimet e tyre.

"Edhe shumë tetovarë të suksesshëm të dalin nga bankat e kësaj shkolle.  Dua vetëm të shpreh kënaqësinë time me atë që shohim sot, vetëm në pak muaj punë vërtet të fortë dhe të përkushtuar dhe ajo që mund të dukej e pamundur atëherë, sot është e mundur, realiste. Dua të falënderoj kryetarin e komunës, këshilltarët nga Komuna e Tetovës që mbështetën këtë projekt, të falënderoj Ministrinë e Arsimit, të gjithë ata që janë dashamirës për Tetovën dhe qytetarët e Tetovës dhe që kanë qenë pjesë e, do të thoja, projekteve të shumta që po zbatohen në Komunën e Tetovës", tha Mickoski.

Në këto dy objekte pranë lumit Shkumbin zhvillohet mësim edhe për paralelet në gjuhën maqedonase. Në ndërtesën e parë tani janë shtatë klasa, kabinet për informatikë, dy tualete, zyra e arsimtarëve, biblioteka dhe dy zara. Në ndërtesën e dytë janë gjashtë klasa, zyra e mësimdhënësve, një tualet, klaka për kabinete të shkencave natyrore dhe një sallë e vogël sportive. sa/

foto: Qeveria e RMV-së