Скопје, 29 ноември 2024 (МИА) - Министерот за надворешни работи и надворешна трговија, Тимчо Муцунски денеска остварил средба со Крис Бартон, Комесар за трговија на Обединетото Кралство.

За време на средбата биле разменети мислења и предлози за натамошно зајакнување на трговската соработка меѓу двете земји, како и за можностите за поголема интеграција на Република Северна Македонија во регионалните и глобалните трговски мрежи.

Како што соопштија од Министерството за надворешни работи и надворешна трговија, Муцунски го запознал Бартон со економските приоритети на Владата на Република Северна Македонија и изразил задоволство од континуираниот раст на трговската размена со Обединетото Кралство. Укажал дека постојат цврсти основи за нејзино зголемување во иднина и го подвлекол значењето на јакнењето на меѓусебната соработка на полето на инвестициите.

Комесарот Бартон го истакнал интересот на Обединетото Кралство за поддршка на британските инвестиции во нашата земја и продолжување на развојот на економските односи преку подобрување на деловната клима.

- Двајцата соговорници разговараа и за продлабочување и проширување на соработката согласно Договорот за партнерство, трговија и соработка помеѓу двете земји, како и за потенцијалните области на соработка, особено развојот на новите технологии, обновливите извори на енергија, инфраструктурата, размена на добри практики во полето на дигиталната и еколошката трансформација, се наведува во соопштението. цр/лв/

Фото: Министерство за надворешни работи и надворешна трговија