11 korrik 2024

Një nga premtimet tona parazgjedhore ishte se ne do të ndërmarrim të gjitha hapat e nevojshme për trajtimin e një prej dukurive më negative shoqërore – lojërat e fatit. 

Kemi PLAN për ballafaqim me pasojat e dëmshme nga bixhozi e që po i ndajmë me qytetarët. 

Hapi i parë i këtij plani është që ta largojmë bixhozin nga shtëpitë tona. Falë vendimeve të gabuara, të papërgjegjshme dhe korruptive të Qeverisë së kaluar, duke hapur tre kompani të reja për organizimin e lojërave të fatit në internet, bixhozi përmes celularëve dhe kompjuterëve u bë pjesë e shtëpive tona dhe kështu të rinjtë u bënë synim edhe më i lehtë për t’u arritur. 

Sot, deputetët e VLEN-it, VMRO-DPMNE-s dhe ZNAM-it, parashtruan Kërkesë për interpretim autentik të nenin 7, paragrafi (3) të Ligjit për lojërat e fatit dhe lojërat zbavitëse, për të marrë interpretim të saktë nëse vendimi i mëparshëm i Qeverisë dhe udhëheqësisë së Llotarisë shtetërore për lojërat e fatit në internet ka bazë ligjore. Ekipi jonë i juristëve është i bindur që vendimi për themelimin e tre kompanive të reja për organizimin e lojërave të fatit në internet është plotësisht pa bazë ligjore. Prandaj presim që Qeveria ta mbështesë këtë siguri ligjore duke dhënë mendim të duhur, nga ku Komisioni juridiko-ligjvënës pranë Kuvendit do ta zbërthej në një interpretim autentik që do të mundësojë mbylljen e lojërave të fatit në internet MENJËHERË! 

Pika tjetër e planit për ballafaqim me pasojat e dëmshme të lojërave të fatit është fillimi i procedurave të duhura gjyqësore për të vërtetuar keqpërdorimet e pozitave zyrtare dhe autorizim të të gjithë autoriteteve të cilët kanë marr pjesë në sjelljen e vendimeve të kundërligjshme lidhur me organizimin e llojeve të ndryshme të lojërave të faitit. 

Në fund, duke pasur parasysh faktin se kemi krijuar një grup pune, presim që Qeveria t'i propozojë Kuvendit një ligj të ri për lojërat e fatit dhe lojërat argëtuese, i cili do të përmbajë një sërë dispozitash me të cilat jemi të sigurt se numri i objekteve të lojërave të fatit do të ulet brenda një periudhe të arsyeshme kohore minimalisht përgjysmë. 

Brenda koalicionit qeverisës ka vullnet politik për ta zbatuar këtë plan. 

Kalojmë në veprim! 

Foto: Vlen

____________________________________________________________________________________________________________________

MIA këto tekste i publikon në formën integrale dhe origjinale dhe nuk mban përgjegjësi për përmbajtjen e tyre dhe as për mangësitë eventuale drejtshkrimore apo gabimet e shtypit.