Kryetarja e Parlamentit shqiptar, Lindita Nikolla, dha dorëheqje nga funksioni
- - Kryetarja e Parlamentit shqiptar, Lindita Nikolla, mbrëmë vonë dha dorëheqje nga funksioni.
- Post By Fitore Curri
- 10:23, 27 korrik, 2024
![Kryetarja e Parlamentit shqiptar, Lindita Nikolla, dha dorëheqje nga funksioni](https://mia.mk/images/20240727102305_big_730x400_50.webp )
Tiranë, 27 korrik 2024 (MIA) - Kryetarja e Parlamentit shqiptar, Lindita Nikolla, mbrëmë vonë dha dorëheqje nga funksioni.
Ajo vetë e bëri të ditur lajmin derisa fliste në Kuvend, duke zbuluar se arsyeja për këtë dorëheqje ka të bëjë me gjendjen e saj shëndetësore.
"Të nderuar kolegë të shumicës parlamentare dhe të nderuar kolegë të opozitës parlamentare. Këtu përfundon sot angazhimi im 3-vjeçar në krye të Kuvendit. Për shkak të gjendjes sime shëndetësore, nuk mund të kryej detyrën e lartë të funksionarit të dytë shtetëror të shtetit, me angazhimin e nevojshëm që e sjell kjo detyrë", tha Nikolla nga foltorja e Kuvendit.
Për çdo ditë, shtoi, jam përpjekur të jap më të mirën time për të siguruar mbarëvajtjen e punës së këtij parlamenti.
"Nëse dikujt i kam krijuar një përshtypje tjetër e siguroj se nuk ka qenë në asnjë mënyrë qëllimi im. Nëse me ndokënd kam gabuar padashje i kërkoj ndjesë. Kam ndjesinë e këndshme të respektit që më jepni të gjithë. Faleminderit të gjithëve", theksoi ajo.
Lindita Nikolla (59) është profesoreshë e njohur universitare. Para se të zgjidhet si parlamentare ajo ishte ministre e Arsimit. fc/
Fotografia: Shërbimi i kuvendit