Скопје, 20 февруари 2026 (МИА) - Министерот за животна средина и просторно планирање Муамет Хоџа денеска присуствуваше на почетокот на изградбата на водоводната мрежа и на атмосферската канализација за жителите на селото Ласкарце во општина Сарај.

- Правиме пресврт во начинот на кој ја третираме состојбата на терен. Целта е трајно да ги решиме инфраструктурните проблеми - изјави Хоџа.

Инвестицијата во Ласкарце за изградба на водоводната мрежа и на атмосферската канализација изнесува 85 милиони денари, средства обезбедени од Министерството за животна средина и просторно планирање, и претставува дел од поширок пакет-проекти со кои систематски се решаваат долгогодишните проблеми на граѓаните во општина Сарај.

Како што соопшти Министерството за животна средина и просторно планирање, набргу ќе почне и уредувањето на Сува Река, со што ќе се обезбеди трајно решение за намалување на ризикот од поплави во населените места на оваа општина. ев/дма/

ФОТО: МЖСПП