Пекинг, 31 март 2026 (МИА) - Кина и Пакистан упатија заеднички повик за итен прекин на војната на Блискиот Исток, презентирајќи план од пет точки кој вклучува примирје и зајакната стратегиска координација во однос на ситуацијата во Иран.

Заедничката иницијатива за „враќање на мирот и стабилноста во Персискиот Залив“ беше објавена по посетата на пакистанскиот министер за надворешни работи, Исхак Дар, на Пекинг.

Кинескиот министер за надворешни работи Ванг Ји потврди дека двете земји ќе ја интензивираат комуникацијата за да се спречи понатамошна ескалација на конфликтот.

Планот предвидува итен прекин на непријателствата, заштита на цивилната и енергетската инфраструктура, како и итно обновување на безбедното движење на бродовите низ Ормуската Теснина.

Двете влади порачаа дека дијалогот е единствениот остварлив пат за решавање на конфликтите. Кина, како клучен партнер на Техеран, и понатаму инсистира на прекин на огнот без да понуди директна воена поддршка, додека Пакистан се позиционира како регионален посредник и покрај сопствените тензии со Кабул. ссм/

фото: ДПА