Мумбај, 22 декември 2025 (МИА) - Индија мора да биде подготвена и за краткорочни и за конфликти со висок интензитет за да го одврати тероризмот, како што е операцијата Шиндур, и за долготрајни војни што произлегуваат од територијални спорови со соседните земји, изјави началникот на Генералштабот на индиската армија, генерал Анил Чаухан.

Чаухан го изрази овој став во говорот во Индискиот институт за технологија во Мумбај. Тој нагласи дека таканаречените повеќедоменски операции (операции во кои воените дејства се координираат на копно, вода, воздух, киберпростор и вселена) повеќе нема да бидат опција, туку неопходност. Ефектите од дејствијата во една област ќе имаат непосредно влијание врз друга област, истакна Чаухан.

Началникот на Генералштабот на индиската армија изјави дека двата главни соперници на Индија се држави со нуклеарно оружје. Тој не ги именуваше земјите, но предупреди дека способноста на индиската војска да ги одврати преку повеќедоменски операции не треба да се намалува.

„Треба да бидеме подготвени да се бориме со краткорочни конфликти со висок интензитет за да го одвратиме тероризмот, како во операцијата Шиндур. Исто така, треба да бидеме подготвени за продолжен конфликт фокусиран на земјиште бидејќи имаме територијални спорови. Сепак, треба да се обидеме да го избегнеме“, додаде Чаухан.

Врховниот воен офицер на земјата предупреди дека тероризмот и непријателските дејствија во сивата зона помеѓу војната и мирот ќе продолжат да претставуваат закана што бара и одбранбени и офанзивни пристапи.

Според Чаухан, модерното војување е на работ на трета револуција во војувањето, која тој ја нарече „конвергентно војување“. Ова се случува затоа што голем број технологии истовремено влијаат врз природата и карактерот на војувањето, додаде Чаухан.

Порано, само неколку технологии влијаеја врз начинот на кој се водат војните. Сега, голем број технологии имаат влијание - вештачката интелигенција, квантната физика, рабното пресметување, хиперсониката, напредните материјали, роботиката, наведе началникот на Генералштабот на индиската армија. мс/

фото: ЕПА