Дебар, 1 април 2026 (МИА) - Националниот координатор за меѓуетничка и меѓуресорска соработка, Салко Куч денеска беше во посета Општина Маврово и Ростуше, каде најпрво имаше средба со градоначалникот Онер Јакупоски. 
 
Според општинскиот сектор за информирање посетата била во насока на понатамошно унапредување и зајакнување на меѓуетничкиот дијалог во регионот.  
 
-На средбата беа потврдени веќе воспоставените одлични односи помеѓу сите етнички и религиски заедници во општината, кои со децении претставуваат пример за соживот, додаваат од секторот. 
 
Соговорниците разговарале за конкретни начини за уште поголемо јакнење на меѓусебната доверба и почит, како и за иницирање на дополнителни активности кои ќе придонесат кон подобра социјална кохезија. 
 
-За нас, различностите не се пречка, туку огромна вредност, а меѓусебната соработка е единствениот темел на кој можеме да градиме вистински напредок за сите граѓани, истакнал градоначалникот Јакупоски. 
 
Додал дека Општина Маврово и Ростуше останува цврсто посветена на градење инклузивна, солидарна и обединета заедница. вт/нд/

Фото: Општина Маврово и Ростуше