Пекинг, 25 февруари 2026 (МИА) – Германскиот канцелар Фридрих Мерц денеска повика на продолжување на владините консултации со кинеските претставници, додека престојува во посета на Кина за разговори со претседателот Шји Џјинпинг.

- Знам дека моите претходници редовно ја посетуваа Кина – рече Мерц за време на средбата со Шји. Тој истакна дека сака да ја продолжи оваа традиција, пренесе ДПА.

- Треба исто така да ги продолжиме германско-кинеските владини консултации, кои беа прекинати поради промената на власта во Берлин и пандемијата – додаде Мерц.

Шји рече дека забележал оти Мерц придава големо значење на односите со Кина.

- Под водство на Мерц, германската влада води политика кон Кина заснована на факти – додаде Шји.

Мерц денеска исто така се сретна со премиерот Ли Чијанг во Големата сала на народот, откако утрово слета во Пекинг.

Последните кинеско-германски владини консултации се одржаа во Берлин во 2023 година. Форматот се одржува од 2011 година и е наменет за продлабочување на соработката меѓу двете страни. јт/