Каиро, 9 февруари 2026 (МИА) - Египетскиот Претставнички дом свикува седница утре, 10 февруари, за да разгледа, според зборовите на генералниот секретар на институцијата, „важно прашање“, во услови на големи очекувања за промени во владата, пишува весникот „Ал Ахрам“.

Нов кабинет се формира на почетокот на секој парламентарен циклус преку целосна или делумна промени во раководните структури на министерствата.

Според Уставот, претседателот може да воведе промени по консултација со премиерот, под услов Претставничкиот дом да ги одобри. За прв пат, претседателот Абдел Фатах ал-Сиси побара мислење од пратениците преку гласање по име за номинираните министри пред церемонијата на положување заклетва.

Процесот започнува со тоа што претседателот формално го известува Домот за својата намера, кое содржи список на предложените министри и нивните соодветни портфолија. Претседателот на парламентот го чита претседателското писмо на глас за време на првата седница и повикува на гласање за промените како целина.

Со мнозинство, пратениците го известуваат шефот на државата, кој ги поканува новите министри да положат уставната заклетва.

Според египетските медиуми, Мустафа Мадбули ќе остане на премиерската функција. Доколку биде потврден, тоа ќе биде негов петти мандат откако првпат ја презеде функцијата во 2018 година. рп/ми/

Фото: МИА архива