Тетово, 23 декември 2025 (МИА) - Во Тетово вечерва беше отворена изложбата „Нумен“ со поднаслов „Меѓу формата и духот“, од авторката Лидија Цвитановиќ Илиевска. Во концертната сала на Музејот на тетовски крај (Дом на АРМ) изложени се 20 дела создадени во различни периоди, во кои доминира реализамот и техниката масло на платно.

-На прв поглед, пред нас се пејзажи, природни мотиви и црковни сцени. Но, зад видливата форма, се чувствува нешто повеќе. Токму тука се оправдува насловот „Нумен“, антички поим што означува божествена волја, дух или сила што го проникнува просторот и стварноста. Делата на Лидија Цвитановиќ Илиевска не тежнеат кон спектакуларност. Тие се смирени, промислени и искрени. Боите се длабоки, композициите избалансирани, а светлината често има симболичка, речиси духовна улога. Особено во црковните мотиви, формата не е цел сама по себе, туку средство преку кое се навестува нешто невидливо - вера, тишина, созерцание, истакна Марко Видачек од Македонско-хрватски друштво кое е организатор на изложбата.

Лидија Цвитановиќ Илиевска, која е родена 1959 година во Тетово, има завршено Факултет за музичка уметност во Во Скопје, отсек соло пеење во класа на проф. Коста Трпков.

-Образование и долгогодишна работа на нашата авторка како професор по музичко образование се чувствуваат во сликарството: во ритамот на потезот, во хармонијата на боите и во внимателно градената атмосфера. Како музичка композиција, и овие слики имаат вовед, развој и тивка кулминација што не се наметнува, туку се доживува. „Нумен“ е изложба што повикува на внимателно гледање и внатрешен дијалог. Таа нè потсетува дека уметноста не мора секогаш да биде гласна за да биде силна, ниту сложена за да биде длабока. Доволно е да биде искрена и создадена со почит кон формата, но и кон духот, истакна Видачек.

До пензионирањето Лидија Цвитановиќ Илиевска  има работено како професор по музичко образование во средното музичко училиште „Тодор Скаловски Тетоец“, средното медицинско училиште „Никола Штејн“ и во основното училиште Симче Настовски во Вратница.
Прва самостојна изложба има поставено во 2008 токму во основното училиште Симче Настовски. Има учествувано на повеќе ликовни колонии, а во 2014 година има поставено изложба во Тетово, заедно со кинеската сликарка Луси Трајковска.

Лидија Цвитановиќ Илиевска е долгогодишен член на Македонско - хрватското друштво, каде има водено и посебна секција за цртање, при што има едуцирано млади кадри за ликовната уметност. Голем дел од нејзините дела се подарени и разубавуваат многу наши и странски објекти. ас/лв/

фото МИА