Вашингтон, 15 април 2026 (МИА) - Морнарицата на Соединетите Американски Држави потврди дека извидувачкото безпилотно летало MQ-4C Triton се урнало во регионот на Персискиот Залив наведувајќи дека станува збор за несреќа, а одредени извори претходно тврдеа дека леталото било соборено од иранската противвоздушна одбрана.

Дронот исчезнал од системите за следење летови за време на мисија над Персискиот Залив, што предизвика шпекулации за негово соборување, пренесе порталот „Прес ТВ“. Леталото MQ-4C Triton спаѓа меѓу најретките и најскапи беспилотни летала во употреба во американската морнарица, со проценета вредност меѓу 235 и 250 милиони долари.

Според достапните податоци, дронот непосредно пред исчезнувањето нагло изгубил висина од речиси 15.000 метри на помалку од 3.000 метри. Во тој момент емитувал сигнали за вонредна состојба - најпрвин кодот 7400 за губење комуникација, а потоа и кодот 7700 за општа вонредна состојба.

Американската морнарица соопшти дека леталото веројатно се враќало во својата база во воздухопловната станица Сигонела во Италија по мисијата за надзор над Персискиот Залив и Ормуската Теснина.

Овој инцидент потсетува на случајот од 2019 година кога иранските сили соборија американски дрон RQ-4 Global Hawk над Оманскиот Залив. Извидувачките летала од типот „тритон“ имаат клучна улога во следењето на ситуацијата во Персискиот Залив и Ормуската Теснина, особено во периодот на нестабилно примирје меѓу САД и Иран. ссм/јт/

фото: Википедија