Shkup, 26 dhjetor 2025 (MIA) - Një konsorcium ndërkombëtar i udhëhequr nga DALEKOVOD d.d. nga Kroacia është përzgjedhur si ofertuesi më i volitshëm në tenderin për ndërtimin e linjës së ndërlidhjes 400 kilovoltëshe Manastir - Elbasan (Komponenti 1: Linja e Transmetimit nga TS Manastir 2 përmes TS Ohrit deri në kufirin maqedono-shqiptar), me anë të të cilit operatori maqedonas i transmetimit të energjisë elektrike, SHA MEPSO, vazhdon zbatimin e projektit për të cilin kontrata me kontraktorin e mëparshëm ishte ndërprerë.

SHA MEPSO njoftoi sot pasdite se përzgjedhja është bërë pas një procedure ndërkombëtare të zhvilluar përmes sistemit të prokurimit elektronik të Bankës Evropiane për Rindërtim dhe Zhvillim (BERZH), e hapur më 25.04.2025, dhe pas një vlerësimi të detajuar të ofertave të paraqitura.

Vlera totale e ofertës së pranuar është 19,696,200.85 euro, ndërsa  me nënshkrimin e kontratës, do të fillojë realizimi i punimeve me afat përfundimi prej 900 ditësh (30 muaj), njofton MEPSO.

Me këtë hap, kompania zyrtarisht rifillon projektin që do të krijojë lidhjen kyçe energjetike midis Republikës së Maqedonisë së Veriut dhe Republikës së Shqipërisë.

SHA MEPSO theksoi në deklaratë se e gjithë procedura është zhvilluar në përputhje me politikat strikte të prokurimit të BERZH-it, të cilat, sipas tyre, janë garanci për transparencë dhe objektivitet.

"Kjo zgjedhje vjen pas vendimit strategjikisht të domosdoshëm të menaxhmentit për të ndërprerë kontratën e mëparshme që kompromentoi dhe vonoi projektin. Kjo procedurë u zhvillua në mënyrë strikte sipas standardeve ndërkombëtare FIDIC. Për të mbrojtur interesin shtetëror dhe efikasitetin financiar, SHA MEPSO siguroi vazhdimësinë e investimit: 51.2% e pajisjeve të nevojshme tashmë janë dorëzuar nga kontraktori i mëparshëm, ato janë në pronësi të MEPSO-s dhe do të përdoret nga kontraktori i sapozgjedhur, duke parandaluar kështu dëmet financiare për kompaninë", thuhet në kumtesë.

Zbatimi i këtij projekti, shpjegojnë ata, mbyll degën e vetme të hapur në sistemin tonë të transmetimit, duke mundësuar përfundimin e Korridorit 8 rajonal të energjisë dhe një përmirësim të ndjeshëm të kushteve të tensionit në pjesën jugperëndimore të vendit. sa/

foto: MEPSO