Bern, 9 mars 2026 (MIA) - Zyra e prokurorit në kantonin zviceran Valais njoftoi sot se hetimi për zjarrin në klubin e natës në Kran-Montana është zgjeruar duke përfshirë pesë zyrtarë aktualë dhe ish-zyrtarë vendorë, përfshirë prefektin e komunës Nikolas Fero.

Familjet e viktimave të zjarrit në lokalin "Konstellejshën", ku humbën jetën 41 persona dhe u lënduan 115 të tjerë, kanë vënë në dukje përgjegjësinë e prefektit të komunës së Kran-Montanës, Fero, për pasivitetin e tij në lidhje me mosrespektimin e masave parandaluese të zjarreve në qytet.

Sipas hetimit, zjarri u shkaktua nga spërkatësit dhe piroteknikët që ndezën tavanin e barit.

Pronarët e barit, Zhak dhe Xhesika Moreti, kanë mohuar çdo shkelje, duke vënë në dukje se bari është inspektuar tri herë, në vitin 2016, 2018 dhe 2019, dhe se nuk janë gjetur probleme të mëdha.

Deri më tani, është zhvilluar një hetim kundër familjes Moreti, si dhe kundër kreut të shërbimeve të sigurisë së Kran-Montana dhe paraardhësit të tij, për vrasje të paqëllimshme, shkaktim të lëndimeve trupore dhe zjarrvënie nga pakujdesia.

Megjithatë, avokatët e familjeve të viktimave kanë kërkuar që hetimi të përfshijë të gjithë administratën e qytetit. sa/

foto: MIA arkivi