Islamabad, 12 maj 2026 (MIA) - Të paktën shtatë persona janë vrarë, mes tyre dy policë dhe pesë civilë, ndërsa dhjetëra të tjerë janë plagosur nga një shpërthim me bomba në një treg në Pakistanin veriperëndimor. 

Shpërthimi ndodhi në tregun Tehsil Sarai Navrang, në afërsi të qarkut Banu, jo larg kufirit me Afganistanin. Në vendngjarje u dërguan ekipe të ndihmës së shpejtë mjekësore dhe të shërbimit zjarrfikës.

Zëvendësshefi i policisë deklaroi se personat e plagosur rëndë janë transportuar në spitalet në Banu, ndërsa drejtori i spitalit njoftoi se deri më tani janë pranuar 37 pacientë, disa prej të cilëve janë në gjendje kritike. 

Pamjet nga vendi i shpërthimit tregojnë dyqane të dëmtuara dhe një automjet të shkatërruar. 

Ky është sulmi i dytë vdekjeprurës në rajon gjatë katër ditëve të fundit, pas shpërthimit të një automjeti pranë një pike policore, ku humbën jetën 15 policë.

Pakistani më herët i akuzoi militantët nga Afganistani fqinj për sulmet, ndërsa autoritetet në Kabul i kanë hedhur poshtë akuzat. qa/

Foto: Arkivi i MIA-s