Të Gjelbrit i fituan Gorton dhe Denton, Laburistët bien në vendin e tretë në zgjedhjet në Britani të Madhe
Londër, 27 shkurt 2026 (MIA) - Partia e Gjelbër në Britaninë e Madhe ka arritur një fitore të rëndësishme në zgjedhjet plotësuese në Gorton dhe Denton, duke e shtyrë Partinë Laburiste të kryeministrit Kir Starmer në vendin e tretë.
Instaluesja lokale e ujit dhe këshilltare e të Gjelbërve, Hana Spenser, është zgjedhur si deputetja e parë femër e partisë në Anglinë veriore, duke përmbysur shumicën e mëparshme prej 13,000 votash të Partisë Laburiste, raporton "Gardian".
Të Gjelbrit fituan 14,980 vota, 5,616 më shumë se Partia Laburiste, ndërsa "Reform UK" doli e dyta me 10,578 vota. Partia Laburiste pa një rënie të mbështetjes me 25.3 për qind krahasuar me vitin 2024. Kjo është fitorja e parë e të Gjelbërve në zgjedhjet plotësuese në Vestminster dhe hera e parë në pothuajse 100 vjet që Gorton në Mançester nuk ka pasur një deputet të Partisë Laburiste.
Në fjalimin e fitores, Spenser tha se njerëzit po lodhen duke punuar për të "mbushur xhepat e miliarderëve" dhe theksoi solidaritetin e komunitetit, me mesazhin se miqtë dhe fqinjët e saj myslimanë janë "njerëz si të gjithë të tjerët".
Zgjedhjet plotësuese u shpallën pasi Endru Gvin dha dorëheqjen për arsye shëndetësore, ndërsa ish deputeti ishte nën hetim parlamentar për mesazhe fyese në një grup në WhatsApp. Burime në Partinë Laburiste thonë se disa votues myslimanë nuk e kanë falur partinë për qëndrimin e saj ndaj Gazës, të cilin të Gjelbrit e shfrytëzuan në fushatë.
Pjesëmarrja në votime ishte 47.6 për qind, pak më e ulët se në zgjedhjet e përgjithshme të vitit 2024. Nënkryetarja e Partisë Laburiste, Lusi Pauel, konfirmoi humbjen dhe tha se Starmer ishte "personi i duhur për këtë punë", duke shtuar se partia duhet ta paraqesë politikën e saj më qartë.
Kandidati i "Reform UK", Met Gudvin, ia hodhi fajin për humbjen "koalicionit të islamistëve dhe progresistëve të zgjuar" dhe akuzoi të Gjelbrit për "politikë sektare".
Fushata u shënua nga akuza të ashpra reciproke midis Partisë Laburiste dhe asaj të Gjelbër, ndërsa "Reform UK" po përballet me një padi në Gjykatën e Lartë për letrat e diskutueshme zgjedhore pa shenja politike të përcaktuara, raporton "Gardian". sa/
Foto: EPA
