Uashington, 26 prill 2026 (MIA) - Sulmuesi në darkën e mbrëmshme të korrespondentëve në hotelin Hilton në Uashington, i cili është identifikuar si Kol Tomas Alen nga Kalifornia, pranoi se objektivi i tij ishin politikanët amerikanë.

Ai do të paraqitet nesër në gjykatë për dy akuza - përdorim të armës së zjarrit dhe sulm ndaj një agjenti federal me një armë të rrezikshme.

Hetuesit thanë se Alen, nga periferia e Los Anxhelosit është një mësues dhe programues i videolojërave. Ai ishte mysafir në hotel. Alen ishte i armatosur me një pushkë gjahu, një pistoletë dhe disa thika.

Pas incidentit, ai është nën mbikëqyrjen e policisë në një spital, ku po merr ndihmë mjekësore. Agjenti që ndaloi sulmuesin përfundoi në spital. Ai u godit në jelekun antiplumb dhe ndodhet në spital.

Pasi Alen hapi zjarr, presidenti Donald Tramp, zonja e parë Melania u evakuuan dhe 2,600 pjesëmarrës në event filluan të iknin, ndërsa agjentët e Shërbimit Sekret rrëzuan sekretarin e shtetit Marko Rubio dhe ministrin e Shëndetësisë Robert F. Kenedi dhe ministrin e Brendshëm Dag Burgum.

Trampi tha pas incidentit të armatosur se kjo nuk do ta dekurajonte nga lufta në Iran, megjithëse supozoi se të shtënat nuk kishin lidhje me konfliktin.

Megjithatë, Trampi më parë tha se "nuk e di kurrë" nëse sulmi kishte lidhje me konfliktin në Iran. Ai theksoi se hetuesit ende po përcaktojnë motivet e sulmuesit, të cilin e përshkroi si një "ujk të vetmuar".

Incidenti u dënua nga kryeministrat e Kanadasë dhe Australisë, Mark Karni dhe Entoni Albanese, dhe presidentja e Meksikës, Klaudia Shajnbaum, duke e përshkruar atë si një akt dhune politike. sa/

foto: Iks