Shkup, 20 shkurt 2026 (MIA) - Doktor Andon Çibishev nga Klinika e Toksikologjisë, i cili është edhe ish-drejtor i kësaj Klinike,  në vitin 2021, pas zjarrit në spitalin modular në Tetovë, në një paraqitje televizive tha se në vend të spitaleve modulare, mundësi më e mirë për kudjes të pacientëve me Kovid ishin departamentet e sëmundjeve infektive dhe të mjekësisë interne.

"Kemi një grumbull institucionesh shëndetësore jofunksionale ose të rrënuara, të lëna në dorë të kohës, të cilat, me pak para dhe pak organizim, mund të përshtateshin dhe të përdoreshin në kontekstin e situatës në të cilën ndodhemi. Këto janë institucione të ndërtuara sipas të gjitha standardeve, ato vetëm duhet të përshtaten", deklaroi në atë kohë doktor Çibishev për emisionin "Çfarë nuk është e qartë" të transmetuar më 11 shtator 2021 në televizionin "Alfa".

Sipas Çibishev, spitalet modulare nuk ishin kapacitete në të cilat mund të ofrohej kujdes intensiv mjekësor. Spitalet modulare, siç thotë, ishin të mbushura deri në shtratin e fundit, dhe në disa vende u shtuan më shumë shtretër dhe u akomoduan më shumë pacientë sesa lejohej hapësira.

"Pse ne, si shtet, si sistem shëndetësor, u mbështetëm në spitalet modulare? Ne kemi kapacitete të caktuara në departamentet e sëmundjeve infektive, në departamentet e mjekësisë interne, ku kemi mund të hospitalizojmë pacientë të tillë që kanë nevojë për kujdes intensiv mjekësor. E përsëris, kujdes intensiv mjekësor, i cili zakonisht shoqërohet edhe me terapinë me oksigjen ose dhënien e oksigjenit pacientëve. Unë besoj se spitalet modulare nuk janë kapacitete në të cilat mund të ofrohet kujdes intensiv mjekësor", thotë Çibishev.

Midis valëve, kur pati njëfarë qetësimi të situatës epidemiologjike, sipas Çibishev, autoritetet duhet të kishin marrë në konsideratë rritjen e kapaciteteve të infrastrukturës dhe shtimin e stafit profesional, sepse nuk kishte mjaftueshëm specialistë të sëmundjeve infektive ose njerëz të kualifikuar për të trajtuar pacientë të sëmurë rëndë të vendosur në aparate respiratore.

"Menaxhimi i një pacienti në aparat respirator është një shkencë e tërë. Mund të kishim dërguar mjekë të rinj në një kurs intensiv, të paktën për t’i edukuar, për t’i trajnuar për të menaxhuar pacientët. Mendoj se kjo do ta kishte përmirësuar shumë situatën dhe do të kishim pasur shumë më pak dëme dhe më pak jetë të humbura", thotë Çibishev.

Edhe avokatja Lejla Kadriu, në një paraqitje të fundit në televizionin "Alfa", duke folur për zjarrin në spitalin modular në Tetovë, tha se gjatë ndërtimit të spitaleve modulare, u bënë kursime në materiale edhe pse për to u siguruan mjete nga Banka Botërore.

Kadriu, e cila në atë kohë u thirr si prokurore publike në vendin e ngjarjes, thotë se hetimi tregoi se gjatë ndërtimit të spitaleve modulare, u përdorën panele me shkumë, të cilat kushtojnë pesë deri në gjashtë euro, në vend të paneleve me lesh guri, të cilat nuk digjen për 40 minuta.

"Edhe në rastin e këtij zjarri, u krye një hetim se si ndodhi dhe si u ndërtua spitali. Dhe doli që për këtë spital modular, dhe për të tjerët, mjetet u siguruan nga Banka Botërore. Janë rreth 90 milionë euro, nga të cilat 30 milionë për spitalet modulare, 60 për ilaçe dhe mrekulli të tjera. Dhe 30 milionë për 10 spitale modulare, të bëra nga materiale të ricikluara. Kur pyeta se sa kushtojnë panelet me lesh guri, i cili nuk digjet për dyzet minuta, është i sigurt për 40 minuta, dhe sa kushtojnë panelet e ricikluara me këto shkuma, doli që në atë kohë panelet që janë të sigurta për 40 minuta kushtonin 17 euro, dhe këto me shkumë nuk kushtonin as 5-6 euro. Pra, ato 10 modulare nuk mund të kishin kushtuar më shumë se, le të themi, 300 mijë euro, për të gjitha 10, ndërsa u shpenzuan tridhjetë milionë", thotë Kadriu.

Spitalet modulare në vend u ndërtuan gjatë kovid-krizës me mjete nga Banka Botërore. Në territorin e gjithë vendit u ndërtuan 19 spitale të tilla, ku u hospitalizuan pacientë me kovid. 

Natën e 8 shtatorit 2021, në spitalin modular në Tetovë shpërtheu një zjarr, në të cilin e humbën jetën 14 persona. Në atë kohë, kjo ishte një nga tragjeditë më të mëdha të vendit. ls/

Foto: Arkivi i MIA-s