Uashington, 21 shkurt 2026 (MIA) - Administrata e presidentit amerikan, Donald Tramp, është gati të shqyrtojë një propozim që do t'i lejonte Iranit të mbante kapacitete "simbolike" të pasurimit të uraniumit, me kusht që Teherani të braktisë plotësisht aftësinë e tij për të zhvilluar bombë atomike, bënë të ditur zyrtarë të lartë amerikanë për Aksios.

Edhe pse ekziston një shans i vogël për një marrëveshje, zyrtarët amerikanë thonë se çdo kompromis me Iranin do të duhet të përmbushë standarde shumë të larta për të "lëvizur përpara" skeptikët në administratën Trampit dhe në Lindjen e Mesme (Izrael).

"Presidenti Tramp do të ishte i gatshëm të pranonte një marrëveshje që do të ishte thelbësore dhe që ai mund ta shesë politikisht në vend. Nëse iranianët duan të parandalojnë një sulm, ata duhet të na bëjnë një ofertë që nuk mund ta refuzojmë. Iranianët vazhdimisht po e humbasin dritaren e mundësisë. Nëse ata po luajnë lojëra, ne nuk do të kemi shumë durim", thonë zyrtarët amerikanë.

Sipas zyrtarëve amerikanë dhe izraelitë, dallimet midis Uashingtonit dhe Teheranit "mbeten të thella" dhe pragu për pranimin e propozimit iranian është i lartë.

Një këshilltar i lartë i Trampit, i cituar nga Aksios, thekson se presidenti amerikan "ende nuk ka vendosur të sulmojë Iranin. Ai mund të mos e bëjë kurrë dhe mund të zgjohet nesër dhe të thotë: ja ku është".

Trampit i janë paraqitur gjithashtu opsione ushtarake që përfshijnë shënjestrimin direkt të liderin suprem ajatollah Ali Hamnei dhe djalit të tij Moxhtaba.

"Ata kanë nga diçka për çdo skenar. Një skenar eliminon ajatollahun, djalin e tij dhe mullahët", thotë këshilltari, duke iu referuar liderit suprem Ali Hamnei dhe djalit të tij Moxhtaba.

Sipas burimeve amerikane, përfaqësuesit e Tramp në bisedimet indirekte me Iranin, Stiv Vitkof dhe Xhared Kushner, i kanë kërkuar Teheranit një propozim të detajuar që do t'i zgjidhte shqetësimet e SHBA-së.

Ministri iranian i Punëve të Jashtme, Abas Aragçi deklaroi se drafti i propozimit do të finalizohej në dy ose tre ditët e ardhshme. Sipas tij, do të duhej të ishte një "marrëveshje fitimprurëse për të dyja palët" dhe do të përfshinte angazhime politike dhe masa teknike, me përfshirjen e mundshme të kreut të Agjencisë Ndërkombëtare të Energjisë Bërthamore, Rafael Grosi, në mbikëqyrjen e programit.

Zyrtarët amerikanë kanë theksuar se vendimi i Uashingtonit për hapat e mëtejshëm do të varet nga përmbajtja e propozimit të shkruar iranian, me mesazhin se "topi është në fushën e tyre". mb/

Foto: MIA