Londër, 9 shkurt 2026 (MIA) - Princi britanik Uiliam dhe princesha Kejt kanë deklaruar se janë thellësisht të shqetësuar nga zbulimet në dosjet që lidhen me autorin e ndjerë të krimeve seksuale Xhefri Epstin.

"Mund të konfirmoj se princi dhe princesha janë thellësisht të shqetësuar nga zbulimet aktuale. Mendimet e tyre janë me viktimat dhe të dashurit e tyre", tha një zëdhënës i Pallatit Kensington, zyra e princit Uiliam dhe princeshës Kejt.

Sipas e-maileve që dolën midis dosjeve të sapo deklasifikuara të Epstin, Endrju Mauthbaten-Uindsor, vëllai i vogël i mbretit Çarls III, ndau dokumente zyrtare britanike biznesi me Epstin në vitin 2010, duke zbuluar informacione në të cilat ai kishte qasje në cilësinë e tij si zyrtar qeveritar.

Ish-princi u përball me vite të tëra shqyrtimi publik dhe mediatik për marrëdhënien e tij të ngushtë me Epstin, gjë që i kushtoi atij rolin dhe titujt e tij mbretërorë. Endrju mohon çdo keqbërje dhe nuk i është përgjigjur kërkesave për koment që kur dokumentet u publikuan për herë të fundit.

Dokumentet e fundit tregojnë se Endrju i kaloi Epstin raporte mbi Vietnamin, Singaporin dhe vende të tjera që ai kishte marrë në lidhje me udhëtime zyrtare. Sipas rregullave të konfidencialitetit, përfaqësuesve të tregtisë nuk u lejohet të publikojnë dokumente konfidenciale ose të ndjeshme.

Gjatë 10 ditëve të fundit, zbulimet rreth dosjeve të Epstiin e kanë vënë kryeministrin britanik Kir Starmer nën presion të madh për emërimin e Piter Mandelson, bashkëpunëtor i ngushtë i Epstin, si ambasador britanik në Shtetet e Bashkuara të Amerikës. Mandelson gjithashtu duket se ka ndarë dokumente qeveritare shumë të klasifikuara në vitet 2009-2010 dhe policia po heton akuzat për shpërdorim të detyrës zyrtare.

Ndërkohë, policia britanike javën e kaluar njoftoi se po shqyrton një akuzë të re kundër Endrjus, në lidhje me një grua të çuar në një adresë në Uindsor. mb/

Foto: MIA