Budapest, 17 prill 2026 (MIA) - Kryeministri i Hungarisë, Viktor Orban deklaroi mbrëmë se është përgjegjës për humbjen e partisë së tij Fides në zgjedhjet parlamentare të 12 prillit dhe bëri thirrje për "ripërtëritje të plotë të komunitetit djathtistë".

Në intervistën e tij të parë pas humbjes në zgjedhje, për kanalin Jutjub "Patriota", kur u pyet drejtpërdrejt se kush ishte përgjegjës për humbjen në zgjedhje, ai u përgjigj: "Unë, unë jam kryetari i partisë".

Ai deklaroi se fushata e tij politike dështoi, megjithëse kishte të gjitha kushtet për të qenë ndryshe dhe për të pranuar përgjegjësinë për rezultatet e dobëta.

"Ne morëm 2.3 mijë vota, ndërsa kundërshtari mori 3.1 milionë", tha Orbani dhe shtoi se premtoi se do ta analizojë këtë pse ata që nuk votuan më parë, tani dolën dhe votuan kundër partisë së tij.

Në pyetjen nëse do të tërhiqet nga posti i kryetarit, tha se rezultatet janë të qarta dhe se kjo është një humbje e madhe.

"Nëse ekipi më thotë të ulem në karrigen e pasme, do ta bëj këtë. Dhe nëse më thonë ta udhëheq ekipin në një ndeshje si kapiten, do ta bëj edhe këtë", tha Orbani.

Ai tha se kjo ishte hera e tretë që i është dashur ta “riorganizojë Fidesin si lëvizje” që kur partia humbi zgjedhjet parlamentare të vitit 2002 dhe u zotua ta përfundojë punën “jo vetëm me kënaqësi, por edhe me gëzim” nëse i jepet mandati për ta bërë këtë.

Orbani tha se do të propozojë thirrjen e kongresit të partisë për të zgjedhur udhëheqësi të re, duke përfshirë kryetarin dhe nënkryetarët.

“Fazën e parë të ripërtëritjes do ta përfundojmë deri në fund të qershorit”, tha ai.

Ai u pajtua se korrupsioni dhe stili luksoz i jetesës së elitës përreth Fidesit ndikuan në rezultatin.

“Kurrë nuk e kam mbuluar korrupsionin, gjithmonë i kam mbështetur autoritetet në marrjen e masave. Por luksi është një çështje tjetër dhe ndikoi në rezultat. Kjo nuk mund të vazhdojë kështu”, theksoi Orbani.

Në zgjedhjet e 12 prillit, koalicioni i Fides dhe partnerët e tij humbën zgjedhjet nga partia opozitare Tisa.

Presidenti hungarez Tamash Sulok e informoi dje liderin e Tisës, Peter Magjar se do t'ia dorëzojë mandatin për formimin e qeverisë së re.

Foto: EPA