Uashington, 14 maj 2026 (MIA) – Entoni Fauçi, ish-drejtori i Institutit Kombëtar për Alergji dhe Sëmundje Infektive dhe këshilltar kryesor mjekësor i presidentit të SHBA-së, ndikoi në hetimin për origjinën e KOVID-19 duke përdorur pozitën e tij për të siguruar që komuniteti i inteligjencës të konsultohej me njerëzit e gabuar – deklaroi sinjalizuesi, operativi i CIA-s, Xhejms Erdman, gjatë dëshmisë para Komitetit për Siguri Kombëtare të Senatit të SHBA-së lidhur me fshehjen e informacioneve për KOVID-19.

Në dëshminë, të cilën e hapi kryetari i Komitetit, senatori Rand Paul, sinjalizuesi pretendon se analistët e CIA-s dhe Inteligjencës Kombëtare përgjegjës për hetimin e origjinës së KOVID-it kanë insistuar të fshihet se virusi kishte origjinë laboratorike, e jo natyrore, me qëllim që të krijohej bazë për miratimin e përdorimit emergjent të produkteve me mRNA.

"Unë jam operativ profesionist i CIA-s dhe, siç e përmendët, kam qenë në detyrë në Zyrën e Drejtorit të Inteligjencës Kombëtare, në Grupin e Iniciativave të Drejtorit ose DIG, ndërmjet marsit 2025 dhe prillit 2026. Isha përgjegjës për udhëheqjen e hetimit të DIG për origjinën e KOVID-it, incidentet anormale shëndetësore dhe fenomenet anormale të paidentifikuara. Jam këtu sot për të folur për fshehjen e KOVID-it, implikimet për sigurinë kombëtare që lidhen me gjetjet hetimore të DIG-ut dhe refuzimin e CIA-s për t’iu përmbajtur mbikëqyrjes ligjore, si dhe për mënyrën se si mund të zgjidhen këto probleme", tha sinjalizuesi gjatë dëshmisë hetimore.

Sipas tij, udhëheqja e komunitetit të inteligjencës dhe analistët më me përvojë e kanë neglizhuar mundësinë që pandemia e KOVID-it të ketë ardhur nga një incident laboratorik.

"Motivet për këtë vështirë se mund të përcaktohen duke pasur parasysh fushëveprimin e punës së DIG-ut. Të qëllimshme ose jo, veprimet e komunitetit të inteligjencës rezultuan me fshehje, shpërdorim burimesh dhe dështim për t’i informuar siç duhet politikëbërësit. Politika e shëndetit publik do të kishte qenë shumë më ndryshe nëse publiku amerikan do të ishte informuar se një virus nga një laborator në Kinë do të shërbente si bazë për miratimin e përdorimit emergjent të produkteve me mRNA të imponuara nga administrata e mëparshme",tha operativi i CIA-s.

Rol në fshehje kishte edhe dr. Entoni Fauçi, i cili ndikoi në procesin analitik dhe në konkludimet, duke përdorur pozitën e tij për të siguruar që komuniteti i inteligjencës të konsultohej me lista konfliktuoze të ekspertëve të përzgjedhur në fusha të caktuara, zyrtarë të shëndetit publik dhe shkencëtarë.

Kjo përfshinte disa nga autorët e punimit “Origjina proksimale e SARS-CoV-2” dhe ekspertë të tjerë të shëndetit publik për më shumë se 20 vjet. Disa nga shkencëtarët ishin pjesë e Grupit të Ekspertëve për Shkencat Biologjike ose B-SEG, një organ këshillimor i Zyrës së Drejtorit të Inteligjencës Kombëtare, anëtarët e të cilit shpesh merrnin fonde të konsiderueshme nga NIAID dhe agjencitë e shëndetit publik.

Shkencëtarët e B-SEG-ut, theksoi sinjalizuesi, kanë ndikuar në hulumtimet për armë të shkatërrimit në masë në laboratorët kombëtarë, në vendimet politike, analizat përfundimtare dhe çështje të tjera të inteligjencës, duke krijuar konflikte interesi, si dhe çështje që lidhen me kundërzbulimin. Që nga viti 2006, B-SEG ofronte shërbime konsulence me honorar për çështje që lidhen me bio-mbrojtjen për komunitetin e inteligjencës, ndërsa në të njëjtën kohë zhvillonin kërkime të financuara nga qeveria dhe mbanin pozita akademike, por edhe pozita në institucione të shëndetit publik, si dhe merrnin pjesë si anëtarë të Akademisë Kombëtare të Shkencave. Ata merrnin financime nga NIAID dhe agjenci të tjera për hulumtime të vaksinave, projekti “Predict” i USAID-it, Programi për Bashkëpunim në Reduktimin e Kërcënimeve, madje kishin bashkëpunuar me shkencëtarë kinezë në studime për koronavirusin dhe patogjenë të tjerë, me qëllim të zhvillimit të vaksinave.

"Nuk kishte mbikëqyrje që do të ndiqte se si ky rrjet marrëdhëniesh ka ndikuar në hulumtim, politikë dhe shëndet publik në mënyrë holistike për më shumë se 20 vjet. Në fakt, disa shkencëtarë të B-SEG-ut e ndihmuan Dr. Entoni Fauçin që në vitin 2015 t’i rishkruante përkufizimet për hulumtimet mbi funksionet e virusit (gain-of-function – shtim i aftësisë për ngjitshmëri më të madhe të virusit, transmetim nga kafshët te njerëzit dhe vdekshmëri më e lartë), me qëllim që të hiqej pezullimi i financimit për kërkime të rrezikshme. Ndërkohë, të tjerë morën pjesë në planifikimin e Event 201 në vitin 2019. Kjo ishte një stërvitje simulimi për pandeminë e koronavirusit, shumë e ngjashme me ngjarjet që ndodhën gjatë pandemisë së KOVID-it. Në të morën pjesë dr. Fauçi dhe persona me lidhje në komunitetin e inteligjencës, si ish-drejtoresha e Inteligjencës Kombëtare, Avril Hejns – dëshmoi operativi i CIA-s gjatë dëshmisë në Senat.

Analistët e CIA-s dhe Inteligjencës Kombëtare përgjegjës për hetimin e origjinës së COVID-it, siç theksoi ai, kanë marrë vendime që nuk ishin në përputhje me konkluzionet e ekspertëve dhe analistëve të fushës, duke favorizuar vazhdimisht teorinë e zoonozës ose origjinës natyrore.

"Pas shqyrtimit të CIA-s për KOVID-in, që kulmoi në vitin 2023, CIA u hakmor ndaj analistëve që mbështesnin hipotezën e rrjedhjes së virusit nga laboratori. Analistët e CIA-s nuk iu kishin nënshtruar korruptimit. Analistët që mbështetën konkludimit për rrjedhje laboratorike në vitin 2023 ndërmorën çdo hap administrativ për të paraqitur shqetësimet e tyre të thella lidhur me integritetin analitik të informatave të inteligjencës. Drejtuesit e CIA-s u hakmorën ndaj tyre për shkak të refuzimit të tyre që të pajtoheshin me rishkrimin anonim të analizës nga udhëheqësia, e cila e ndryshoi vlerësimin në një gjykim", tha ai.

Ndikimi i Dr. Entoni Fauçit mbi analizën e origjinës së KOVID-it në komunitetin e inteligjencës dhe roli i pavetëdijshëm që disa shkencëtarë të B-SEG-ut dhe punonjës të inteligjencës luajtën në fshehje, treguan pse kjo çështje është shqetësuese. Pamundësia për të zgjidhur paaftësinë e qeverisë së SHBA-së për të bërë dallimin midis shëndetit publik dhe bio-mbrojtjes, si dhe ekosistemi rezistent ndaj mbikëqyrjes, krijuan terren pjellor për kërkime gjithnjë e më të rrezikshme mbi funksionet e virusit në SHBA, si dhe për kërkime të ngjashme të zhvilluara në laboratorë jashtë vendit të mbështetur nga qeveria amerikane.

Ndryshimet në rolet dhe përgjegjësitë në shëndetin publik dhe bio-mbrojtje pas sulmeve të 11 shtatorit i mjegulluan kufijtë mes shkencëtarëve, ushtrisë dhe komunitetit të inteligjencës. Kjo rezultoi me një politikë qëllimisht jotransparente dhe të panevojshme kërkimore dhe financiare për bio-mbrojtjen, dukshëm e krijuar për zgjerimin e burokracisë. Kjo është një krizë e sigurisë kombëtare e shkaktuar nga mungesa e mbikëqyrjes së vërtetë reale.

Dështimet sistematike që lidhen me kufijtë e paqartë mes bio-mbrojtjes dhe shëndetit publik, si dhe me infrastrukturat tepër komplekse, janë përkeqësuar nga përpjekjet e dokumentuara për t’iu shmangur mbikëqyrjes. CIA nuk e respektoi mbikëqyrjen ligjore gjatë hetimit të DIG-ut. Kjo sjellje ndikoi ndjeshëm në zbatimin e disa urdhrave ekzekutivë të lëshuar gjatë kësaj administrate dhe të ngarkuara për DIG-un, nga drejtoresha Tullsi Gabard. CIA refuzoi të japë informacionet e nevojshme për të kuptuar pse standardet analitike në CIA ishin shkelur.

CIA monitoronte në mënyrë të paligjshme përdorimin e kompjuterëve dhe telefonave nga punonjësit e DIG-ut, hetimet e tyre dhe kontaktet me sinjalizuesit. Këta ishin amerikanë që përgjoheshin në mënyrë të paligjshme ndërsa kryenin detyrat e urdhëruara nga presidenti dhe nën autorizimin e drejtorit të Inteligjencës Kombëtare. Një kontraktor i CIA-s, i cili ndihmonte në hetimin e DIG-ut për ngjarjet e ndodhura ndërmjet viteve 2022 dhe 2023, u pushua nga CIA një ditë pas takimit me DIG-un.

Kur DIG-u ndërpreu operacionet, CIA gjithashtu ktheu mbrapsht 40 kuti me dosjet e JFK-së dhe dosjet MK-Ultra, të cilat po përpunoheshin për deklasifikim nga drejtoresha Tullsi Gabard. Pushteti legjislativ dhe ai ekzekutiv do të vazhdojë të jetë i dezinformuar nëse ky lloj veprimi nuk zgjidhet. Një pjesë e zgjidhjes për kërkimet e rrezikshme gain-of-function tashmë është përfshirë në urdhrin ekzekutiv 14292, i cili përmirëson sigurinë e kërkimeve biologjike. Na nevojitet një shqyrtim gjithëpërfshirës i kërkimeve të financuara nga qeveria dhe rikthimi i përkufizimeve për gain-of-function dhe kërkimet për armë të shkatërrimit në masë, siç ishin para 11 shtatorit, veçanërisht në komunitetin e inteligjencës dhe Agjencinë e Sigurisë Kombëtare – tha sinjalizuesi.

Ai rekomandon mbikëqyrje më efikase dhe që agjencitë të mbajnë përgjegjësi për mosrespektimin e urdhrit ekzekutiv 14292.

"Duhet të jeni të gatshëm të tërhiqni fondet dhe, nëse është e nevojshme, të thërrisni një komitet tjetër kishtar. Rezultatet e hetimit tonë do të ishin të pamundura pa sinjalizuesit e brendshëm, të cilët ishin të gatshëm të dilnin publikisht. Ata janë reformatorë të pazëvendësueshëm. Pavarësisht ligjit, rregulloreve të agjencisë dhe kërkesave për trajnim, sinjalizuesit pothuajse kurrë nuk mbrohen. Mbrojtja e sinjalizuesve gjithmonë duket se mbron agjencinë. Sa herë që CIA heton vetveten, rastësisht nuk gjen parregullsi. Kur identifikojnë probleme, atëherë sistemi është përgjegjës. Kjo deklaratë e fundit është përgjigje fjalë për fjalë nga një avokat i Qendrës për Evropë dhe Euroazi, kur inspektori i përgjithshëm i CIA-s konstatoi mangësi serioze, kështu që organet mbikëqyrëse mbajtën takime për këtë tre vjet pas ngjarjeve. Kjo ishte përgjigje ndaj pyetjes nëse dikush mbajti përgjegjësi. Me sa duket, sistemi është mjaftueshëm i mirë.

E vetmja mënyrë për ta zgjidhur këtë problem është përmes përgjegjësisë reale për mosrespektimin e mbikëqyrjes nga pushteti ekzekutiv dhe legjislativ, si dhe përmes një mekanizmi ku sinjalizuesit mund të vazhdojnë të kontribuojnë në mision pa frikë nga hakmarrja. Të gjithë elementët e komunitetit të inteligjencës duhet të largohen nga agjencitë dhe të jenë pjesë e një subjekti të veçantë të kontrolluar nga inspektori i përgjithshëm i komunitetit të inteligjencës. Punonjësit e komunitetit të inteligjencës duhet të certifikohen për kryerjen e përgjegjësive të rregullta të raportimit ndaj Ministrisë së Drejtësisë dhe mbikëqyrjes legjislative – theksoi operativi i CIA-s gjatë dëshmisë në Senatin e SHBA-së lidhur me fshehjen e informacioneve për KOVID-19.

Foto: printskrin