Shkup, 17 shkurt 2026 (MIA) - Ministri i Administratës Publike, Goran Minçev, sot zhvilloi takim pune me Peter Vag, këshilltar i lartë në OECD/SIGMA, në të cilin u diskutuan proceset kryesore të reformës në fushën e administratës publike, me theks të veçantë në përgatitjen e Ligjit për menaxherët e lartë të organeve të administratës shtetërore dhe fondeve, si dhe Ligjit për organizimin dhe punën e organeve të administratës shtetërore.

Ministria e Administratës Publike njoftoi se në takim u diskutuan parimet e profesionalizimit, një sistem merite, transparencë dhe llogaridhënie në emërimin dhe menaxhimin e strukturave të larta drejtuese në administratën shtetërore, si dhe nevojën për një ndarje të qartë të kompetencave, koordinim të përmirësuar dhe efikasitet të rritur në funksionimin e institucioneve përmes zgjidhjes së re ligjore për organizimin dhe punën e organeve të administratës shtetërore.

Ministri Minçev theksoi rëndësinë e mbështetjes së vazhdueshme të ekspertëve nga OECD/SIGMA në procesin e përgatitjes dhe harmonizimit të zgjidhjeve ligjore me standardet dhe praktikat e mira evropiane.

"Reforma e administratës publike është një nga prioritetet tona kryesore. Me Ligjin për menaxherët e lartë, ne vendosim kritere të qarta, transparente dhe profesionale për përzgjedhjen dhe llogaridhënien e stafit drejtues. Qëllimi ynë është një administratë që punon në shërbim të qytetarëve, bazuar në njohuri, integritet dhe rezultate", theksoi ministri.

Nga Ministria shtuan se përfaqësuesi i OECD/SIGMA është shprehur gatishmëri për mbështetje të mëtejshme, me qëllim sigurimin e përputhshmërisë me parimet e qeverisjes së mirë dhe standardet administrative evropiane. mb/

Foto: MAP