Berlin, 30 mars 2026 (MIA) – Kancelari gjerman Fridrih Merc tha se 80 përqind e mbi 900.000 qytetarëve sirianë që aktualisht jetojnë në Gjermani duhet të kthehen në vendin e tyre brenda tre vitesh.

Në konferencën e sotme për shtyp në Berlin, të mbajtur së bashku me presidentin e përkohshëm sirian Ahmed al-Shara, Merc vuri në dukje se të dy udhëheqësit kishin arritur një marrëveshje mbi këtë plan.

Sipas kancelarit, gjatë "një periudhe më të gjatë prej tre vitesh", rreth 80 përqind e sirianëve në Gjermani duhet të kthehen në vendin e tyre, duke theksuar se kjo ishte edhe dëshira e presidentit Al Shara.

"Ata sirianë që duan të qëndrojnë në Gjermani dhe që janë të integruar mirë do të jenë në gjendje ta bëjnë këtë", shtoi Merc.

Gjermania ishte një nga destinacionet kryesore për refugjatët sirianë gjatë luftës civile shkatërruese, me rreth një milion njerëz që mbërritën në vend ndërsa Bashar al-Asad ishte në pushtet. Që nga përmbysja e tij në fund të vitit 2024 nga një koalicion i udhëhequr nga al-Shara, thirrjet për kthimin e shtetasve sirianë në atdheun e tyre janë bërë gjithnjë e më të zakonshme në qarqet konservatore dhe të krahut të djathtë gjermanë, raporton agjencia gjermane e lajmeve DPA. sa/

foto: EPA