Moskë, 10 prill 2026 (MIA) - Kremlini njoftoi sot se vizita e të dërguarit të posaçëm të presidentit rus Vladimir Putin për investime, Kirill Dmitriev, në SHBA nuk do të thotë se negociatat për një marrëveshje të mundshme paqësore në Ukrainë kanë vazhduar.

Dmitriev u takua me anëtarë të administratës së Presidentit Donald Trump në SHBA për të diskutuar për marrëveshjen paqësore dhe bashkëpunimin ekonomik midis Uashingtonit dhe Moskës.

"Kiril Dmitriev nuk po negocion për një zgjidhje në Ukrainë dhe kjo nuk është një vazhdim i negociatave. Kiril Dmitriev kryeson grupin për çështjet ekonomike dhe vazhdon të punojë brenda këtij grupi", tha sot zëdhënësi i Kremlinit, Dmitri Peskov.

Të enjten, Putin njoftoi një armëpushim 32-orësh në Ukrainë për Pashkët, ndërsa Presidenti ukrainas Volodimir Zelenski tha se Kievi do ta respektojë armëpushimin.

Peskov, i cili tha se bisedimet paqësore janë shtyrë për shkak të ngjarjeve në Lindjen e Mesme, tha se armëpushimi është humanitar sipas natyrës dhe se Rusia dëshiron një marrëveshje të vërtetë paqësore, jo vetëm një armëpushim.

“Siç e kemi thënë shumë herë, dhe siç tha Presidenti Putin, ne nuk duam armëpushim, ne duam paqe, paqe të qëndrueshme”, tha Peskov. ls/