Islamabad, 12 maj 2026 (MIA) - Të paktën 372 civilë kanë humbur jetën, ndërsa 397 janë plagosur në përleshjet kufitare midis Afganistanit dhe Pakistanit në tre muajt e parë të vitit 2026, theksohet në raportin e sotëm të Kombeve të Bashkuara.

 Misioni për  Ndihmë i KB-së në Afganistan (UNAMA) bëri të ditur se forcat e sigurisë pakistaneze janë përgjegjëse për vrasjen dhe plagosjen e civilëve në 94 nga 95 incidentet e dokumentuara, ndërsa Afganistani u fajësua në një rast.

 Numri më i madh i viktimave janë regjistruar në sulmet ajrore pakistaneze të kryera në shkurt dhe mars.

 Një nga incidentet më vdekjeprurëse ndodhi më 16 mars në Kabul, kur sulmet ajrore pakistaneze goditën spitalin për rehabilitim nga droga "Omid" në Kabul.

 UNAMA bëri të ditur se të paktën 269 civilë janë vrarë dhe më shumë se 122 janë plagosur pasi tre sulme ajrore goditën objektin me 2.000 shtretër, të vendosur në ish-bazën e NATO-s Kampin Feniks. Shumica e viktimave ishin pacientë që merrnin trajtim për varësinë nga droga.

 UNAMA theksoi se numri i vërtetë i të vdekurve mund të jetë dukshëm më i lartë, pasi disa trupa mbeten të paidentifikuar dhe familjet vazhdojnë të kërkojnë të afërmit e zhdukur.

 Pakistani akuzon qeverinë talebane në Afganistan për mbështetjen e Tehrik-e-Taliban Pakistan (TTP), një grup militant që ka kryer sulme në Pakistan për dekada të tëra. Kabuli i mohon akuzat, ndërsa KB thotë se Islamabadi nuk ka ofruar prova se autoritetet talebane kanë drejtuar operacionet e TTP-së.

 Foto: Arkivi i EPA-s