Shkup, 21 shkurt 2026 (MIA) - Konferenca me temën "E ardhmja evropiane e Ballkanit Perëndimor: Integrimi politik, bashkëpunimi rajonal dhe qëndrueshmëria ekonomike në kohë sfidash globale" vazhdon sot në Shkup, me fjalime hapëse dhe tre diskutime në panel, ku do të flasin, ndër të tjerë, kryeministri Hristijan Mickovski dhe ish-presidenti Gjorge Ivanov.

Konferenca, e cila organizohet nga Unioni Pan-Evropian i Maqedonisë, në bashkëpunim me Unionin Pan-Evropian të Austrisë, Fondacionin Oto fon Habsburg dhe Institutin e rajove të Evropës nga Salcburgu, u hap dje me një fjalim kryesor nga presidentja Gordana Siljanovska Davkova.

Në ditën e dytë të Konferencës, sot, fjalime hapëse do të mbajnë kryeministri Hristijan Mickovski, presidenti i Unionit Pan-Evropian të Maqedonisë, Andrej Lepavcov, dhe kryetari i Unionit Ndërkombëtar Pan-Evropian, Pavo Barishiq.

Në Konferencë, siç thekson organizatori, do të mbahen tre panele. I pari është Paneli i lidershipit me temën "Sigurimi i të ardhmes evropiane të Ballkanit Perëndimor: Lidershipi, angazhimi politik, integrimi dhe bashkëpunimi rajonal në kohë sfidash globale". Moderatori i panelit të parë është kryetari i Unionit Pan-Evropian të Maqedonisë dhe ish-Ambasadori në BE, Lepavcov, ndërsa panelistët janë kryetari i Unionit ndërkombëtar Pan-Evropian, Barishqi, Sekretari i përgjithshëm i Këshillit të Bashkëpunimit Rajonal, Amer Kapetanoviq, kryetari i Iniciativës Evropiane për Stabilitet, Gerald Knaus, dhe drejtori i Fondacionit Konrad Adenauer-Shkup, Daniel Braun.

Paneli i dytë është një panel pan-evropian me temën "Zgjerimi dhe Stabiliteti i BE-së: Si të vazhdojmë me Ballkanin Perëndimor?", i cili do të moderohet nga Gjoko Vukanovski nga Unioni Pan-Evropian i Maqedonisë, ndërsa panelistët janë Lepavcov, kryetari i Unionit Pan-Evropian të Shqipërisë, Genc Polo, kryetarja e Unionit Pan-Evropian të Malit të Zi, Gordana Guroviq, ish-ambasadori i Serbisë në Bashkimin Evropian, Dusko Lopandiq, dhe kryetarja e Unionit Pan-Evropian të Bullgarisë, Gergana Pasi.

Kjo do të pasohet nga fjalime të shkurtra nga përfaqësues të organizatave pan-evropiane nga Evropa.

Panel diskutimi i tretë është me temën "Marrëdhëniet midis Ballkanit Perëndimor dhe BE-së në një peizazh politik, sigurie dhe ekonomik në ndryshim", i cili do të moderohet nga Ambasadori Kire Ilioski nga Unioni Pan-Evropian i Maqedonisë. Folësi kryesor është ish-presidenti Gjorge Ivanov, ndërsa panelistët përfshijnë profesorin nga Fakulteti i Ekonomisë - Shkup, Lubomir Kekenovski, Ish-zëvendëskryeministrin për Çështje Evropiane dhe ambasador, Ivica Bocevski, ish-kryeministrin Emil Dimitriev, si dhe profesorin në Universitetin e Evropës Juglindore në Tetovë, Veton Latifi. mb/

Foto: MIA