Shkup, 4 mars 2026 (MIA) - Më 4 mars shënojmë Ditën botërore të ndërgjegjësimit për papilloma virusin human (PVH) - një nga viruset më të zakonshme që transmetohen përmes rrugës seksuale dhe është shkaku kryesor për kancer të qafës së mitrës. Kjo ditë është përkujtues se bëhet fjalë për problem serioz shëndetësor, por i parandalueshëm, njoftoi sot Asociacioni i Gjinekologëve dhe Obstetërve të Maqedonisë (AGJOM).

"PVH është grup prej më shumë se 200 lloje virusesh, nga të cilat rreth 40 transmetohen përmes kontaktit seksual. Vlerësohet se më shumë se 80 për qind të personave seksualisht aktivë do të vijnë në kontakt me virusin të paktën një herë në jetën e tyre. Tek shumica e njerëzve, infeksioni kalon pa simptoma dhe trupi e eliminon vetë. Megjithatë, tek disa njerëz virusi mund të vazhdojë dhe me kalimin e kohës të çojë në ndryshime parakanceroze dhe kancer", informoi AGJOM.

Në vendin tonë, kanceri i qafës së mitrës është ndër sëmundjet më të zakonshme malinje tek gratë. Çdo vit regjistrohen afërsisht 150 deri 170 raste të reja. Incidenca është rreth 20 raste të reja në 100.000 gra në vit, që është më e lartë se standardet e dëshiruara evropiane. Në mënyrë shtesë brengos fakti që raste regjistrohen edhe tek shumë gra të reja.

"Pothuaj 99 për qind të rasteve të kancerit të qafës së mitrës ndërlidhen me infeksion afatgjatë me lloje me rrezik të lartë të PVH-së. Kjo e bën këtë sëmundje një nga sëmundjet e rralla malinje që mund të parandalohen në mënyrë efektive", njofton AGJOM.

Vaksinimi është masë kyçe parandaluese. Siç theksoi AGJOM, në vendin tonë, vaksinimi kundër PVH-së është pjesë e kalendarit kombëtar të imunizimit dhe rekomandohet për vajzat dhe djemtë në moshë adoleshente. Vaksina është e sigurt, efektive dhe ofron mbrojtje kundër llojeve më të zakonshme me rrezik të lartë të virusit.

"Megjithatë, përfshirja e vaksinimit në vend është rreth 50-55 përqind, që është dukshëm nën përfshirjen e rekomanduar prej të paktën 90-95 për qind të kërkuar për mbrojtje kolektive. Kjo tregon nevojën për edukim shtesë dhe rritje të ndërgjegjësimit publik", shtoi AGJOM.

Përvojat ndërkombëtare tregojnë se vendet me përfshirje të lartë të vaksinimit shënojnë ulje dramatike të ndryshimeve parakanceroze dhe rasteve të sapodiagnostikuara të kancerit të qafës së mitrës tek gjeneratat e reja. bsh/

Foto: MIA arkiv