Athinë, 2 mars 2026 (MIA) - Anija luftarake "Kimon" po dërgohet menjëherë në Republikën e Qipros, së bashku me një fregatë të dytë greke me një sistem të përparuar anti-dronë, si dhe një çift aeroplanë luftarakë ushtarakë F-16, njoftoi ministri i Mbrojtjes Kombëtare të Greqisë, Nikos Dendias, raportoi korrespondentja e MIA-s nga Athina.

Dendias tha se kryeministri grek Kiriakos Micotakis pati një bisedë telefonike me presidentin qipriot Nikos Hristodulidis dhe se ai personalisht ka qenë në komunikim të vazhdueshëm me homologun e tij qipriot, ministrin e Mbrojtjes Vasilis Palmas, gjatë dy ditëve të fundit.

"Pas sulmeve të paprovokuara në territorin e Republikës së Qipros, e sigurova zotin Palmas se Greqia do të kontribuojë në çdo mënyrë të mundshme në mbrojtjen e Republikës së Qipros gjatë gjithë krizës aktuale, me qëllim përballimin e kërcënimeve dhe veprimeve të paligjshme në territorin e saj. Në përputhje me këtë dhe bazuar në një vendim të Këshillit Qeveritar për Politikë të Jashtme dhe Mbrojtje (KISEA), anija luftarake "Kimon" po dërgohet menjëherë në Republikën e Qipros, së bashku me një anije të dytë greke që do të mbajë sistemin "Kentavros", si dhe një palë aeroplanë luftarakë F-16, me qëllim që të kontribuojë në mbrojtjen e saj kundër kërcënimeve me të cilat përballet", tha Dendias.

Ai shtoi se për një koordinim më të mirë të aktiviteteve me Republikën e Qipros, do të niset nesër për në Qipro, së bashku me Shefin e Shtatmadhorisë së Mbrojtjes Kombëtare. mb/