Teheran, 3 mars 2026 (MIA) – Ministri i Punëve të Jashtme të Iranit, Abas Aragçi tha sot se komentet e bëra disa orë më parë nga Sekretari amerikan i shtetit, Marko Rubio, treguan se SHBA “ka hyrë në një luftë që e zgjodhi vetë në emër të Izraelit”.

Rubio deklaroi mbrëmë se sulmet e Uashingtonit ndaj Iranit janë një masë proaktive në mbrojtje të SHBA-së para një “kërcënimi të pashmangshëm”.

"E dinim se do të kishte aksion izraelit. Ne e dinim se kjo do të shkaktonte një sulm ndaj forcave amerikane dhe e dinim se nëse nuk do t'i ndiqnim paraprakisht përpara se të nisnin ato sulme, do të pësonim viktima më të mëdha", ka thënë Rubio duke shtuar: "Kjo duhej të ndodhte, sido që të ishte".

"Rubio e pranoi atë që të gjithë e dinim: SHBA hyri në një luftë që e zgjodhi vetë në emër të Izraelit. Nuk pati kurrë ndonjë të ashtuquajtur 'kërcënim' iranian", deklaroi Aragçi, duke shtuar se për këtë arsye, "derdhja e gjakut amerikan edhe iranian" është barrë e Izraelit.

"Populli amerikan meriton më mirë dhe duhet ta kthejë vendin e tij", vazhdoi ministri iranian në një postim në X.

SHBA dhe Izraeli të shtunën nisën një ofensivë në shkallë të gjerë kundër Iranit, duke shkaktuar një përshkallëzim rajonal në të cilin Teherani lëshoi ​​raketa në bazat amerikane në disa shtete të Gjirit.