Jerusalem, 10 mars 2026 (MIA) - Ministri i Jashtëm iranian, Abas Aragçi, tha në një intervistë për televizionin PBS se nuk beson se "çështja e negociatave me amerikanët ose rinegociimet me amerikanët do të vihet në rend dite", raportoi "Jerusalem Post".

Sipas Aragçit, SHBA ka humbur potencialin për negociata të ardhshme duke sulmuar vazhdimisht Iranin gjatë bisedimeve diplomatike - së pari në qershor të vitit të kaluar dhe tani.

"Këtë vit ata u përpoqën të na bindnin se këtë herë është ndryshe. Na premtuan se nuk kishin ndërmend të na sulmonin", tha Aragçi, duke shtuar: "Kjo është arsyeja pse nuk mendoj se bisedimet me amerikanët do të jenë përsëri në rend dite."

Ministri mohoi gjithashtu se Irani po ushtronte presion të qëllimshëm ndaj SHBA-së dhe Izraelit duke sulmuar prodhimin e naftës në vendet e tjera të rajonit. Ai tha se anijet cisternë të naftës "kanë frikë të kalojnë nëpër Ngushticën e Hormuzit", por "Irani nuk po i pengon ata të lundrojnë në këtë ngushticë". Në vend të kësaj, ministri fajësoi agresionin amerikan dhe izraelit kundër Iranit, duke thënë se sulmet e tyre kishin destabilizuar rajonin. "Kjo është një luftë që na u imponua", tha Aragçi, duke shtuar: "Ne vetëm po mbrojmë veten. Ka agresion kundër nesh që është absolutisht i paligjshëm. Dhe ajo që po bëjmë është një akt vetëmbrojtës që është i ligjshëm dhe legjitim."

"Pra, ne tashmë i kemi paralajmëruar të gjithë në rajon se nëse SHBA na sulmon, për shkak se nuk mund të arrijmë në territorin amerikan, do të na duhet të sulmojmë bazat e tyre në rajon, objektet e tyre, vendndodhjet e tyre, asetet e tyre. Si rezultat, lufta do të përhapet në të gjithë rajonin", tha diplomati më i lartë i Iranit, duke shtuar: "Pra, këto janë pasojat, pasojat e agresionit amerikan kundër nesh. Ne nuk jemi përgjegjës për këtë." sa/

foto: EPA