Љубљана, 2 септември 2025 (МИА) – Шефицата на словенечката дипломатија Тања Фајон изјави дека завршениот Бледски стратешки форум (БСФ) бил „најтежок“ поради кризите и војните во светот и оти е испратена порака до светските лидери да бидат поодговорни.

- Кога ќе повлечеме линија, ми се чини дека ова дефинитивно беше најтешкиот Форум, најтешкиот во однос на суштинските дискусии во време на големи кризи и војни околу нас, кога светот е силно поделен, кога гледаме дека силата преовладува над сè, а помалку владее, кога нема политичка волја за почитување на меѓународното право за да се стави крај на војните, изјави Фајон по завршувањето на јубилејниот, 20-ти БСФ.

Форумот се одржа под официјалниот наслов „Светот што избега“, на кој учествуваа повеќе од 2.300 лица од 94 земји.

Клучните прашања на Форумот беа како да се направи посилна, пообединета и поповрзана Европа, а една од темите беше и проширувањето на Европска Унија кон Западен Балкан.

За време на состанокот со министрите за надворешни работи од Западен Балкан, Фајон ја истакна „силната поддршка на Словенија за забрзаниот и поефикасен процес на проширување на ЕУ“, што според неа е „геостратешка неопходност“.

Фајон потпиша договор со директорот на  Агенцијата на ОН за помош на палестинските бегалци (УНРВА), Филип Лазарини и со претседателката на Меѓународниот комитет на Црвениот крст (ИЦРЦ), Мирјана Шпољариќ Егер за помош на двете организации. Според договорот Словенија до 2028 година ќе издвои четири милиони евра за УНРВА и најмалку пет милиони евра за  ИЦРЦ во периодот од 2026 до 2030 година. ми/

фото: ЕПА