Никозија, 30 август 2026 (МИА) – Капетанот и седум членови на екипажот на потонатиот ферибот во близина на Северен Кипар се уапсени, изјави премиерот на самопрогласената Турска Република Северен Кипар, Унел Устал.

Тој истакна дека „ќе бидат истражени сите аспекти на инцидентот“ и оти никој нема да биде поштеден од одговорност.

Според најновите информации при превртувањето на фериботот „Фило џет“ бројот на жртвите се искачи на девет, 237 лица се спасени, а сè уште се трага по 23 луѓе. Меѓу повредените има три деца, кои се на интензивна нега, но не се во животна опасност.

Откако фериботот почнал да тоне некои од патниците скокнале во морето, додека другите ги чекале спасувачите на превртениот брод.

Фериботот по превртувањето во близина на брегот на Северен Кипар потона на длабочина од 514 метри.

По несреќата турскиот претседател Реџеп Тајип Ердоган истакна дека Турција ги мобилизирала сите свои ресурси во потрага по исчезнатите лица.

Помош во потрагата и спасувачките операции понуди и Република Кипар. Портпаролот на кипарската Влада, Константинос Летибиотис на Икс објави дека „во еден ваков момент, заштитата на човечкиот живот е над сè“.

Траектот пловел од пристаништето Киренија, познато и како Гирне, до турското пристаниште Ташугу во покраината Мерсин и почнал да се полни со вода на околу 7,5 километри од брегот, а засега непознати се причините за несреќата. 

Кипар е поделен на два дела откако турската армија на 20 јули 1974 година го нападна северниот дел од островот како одговор на државниот удар насочен кон присоединување на островот кон Грција. Во 1983 година еднострано е прогласена Турската Република Северен Кипар во северниот дел од островот окупиран од Турција. Турската Република Северен Кипар е признаена само од Анкара. ми/

фото: Икс