Атина, 19 август 2024 (МИА) – Во рамките на патролите и зголемените мерки за безбедност во подрачјата зафатени со минатонеделниот пожар во североисточниот дел на областа Атика, грчката полиција уапсила две лица, кај кои биле пронајдени алати за провала и веројатно нивната намера била кражби од оштетените објекти, јави дописничката на МИА од Атина.

Од грчката полиција соопштија дека уапсените, на возраст од 35 и 23 години, се превезувале со автомобил во една од населбите зафатени од пожарот, а откако биле оценети како сомнителни и бил извршена проверка на возилото, биле пронајдени и одземени помала количина дрога, како и радиостаница, шрафцигер, копач и импровизирана дрвена палка.

Едниот од уапсените веќе има криминално досие и во минатото издржувал и затворски казни за разбојништва, кражби и поседување дрога.

- Патролите во подрачјата погодени од неодамнешните пожари ќе продолжат со спроведување на превентивни и репресивни активности за спречување на незаконски дејствија како и обезбедување на целата потребна помош и поддршка на жителите, соопштија од грчката полиција.

Во петокот беа приведени околу десет лица, а едно беше уапсено за кражби во оштетените објекти од пожарот а тогаш државната телевизија ЕРТ објави дека станува збор за Роми. ср/

Фото: Грчка полиција