Скопје, 13 јуни 2024 (МИА) - Претседателката Гордана Сиљановска Давкова денеска во Вила Водно во пресрет на одржувањето на Самитот на шефови на држави и влади на учесниците во Процесот за соработка во Југоисточна Европа, остварила средба со претседателот на Црна Гора, Јаков Милатовиќ.

На средбата Сиљановска Давкова и Милатовиќ ги потврдија пријателските односи меѓу двете земји и изразија подготвеност за натамошно унапредување на севкупните билатерални односи.

- Во разговорот беше нагласена неопходноста од продолжување на меѓусебната поддршка и соработка во насока на исполнување на заедничките стратешки определби за членство во Европската Унија и беше изразена подготвеност за продлабочување на регионалната соработка со цел одржување на стабилноста и економскиот напредок на земјите од регионот, соопштија од кабинетот на Сиљановска Давкова.

Претседателката Сиљановска Давкова посочила дека евроинтеграцијата на државите од регионот е од суштинско значење за стабилноста и развојот и во таа насока е потребна јасна перспектива за приклучување кон ЕУ, доследно вреднување на копенхагенските критериуми и нивна кредибилна имплементација.

На средбата, како што стои во соопштението, била изразена подготвеност за натамошно продолжување на политичко-безбедносната соработка и партнерството во рамките на НАТО, а биле разменети мислења за актуелните политички и безбедносни случувања во регионот и во Европа. цр/ац/

Фото: кабинет на Претседателката Гордана Сиљановска Давкова