Скопје, 19 јули 2022 (МИА) - Археографска граѓа, монографски публикации коишто се редок библиотечен материјал – значајни за македонскиот јазик, литература и култура, средновековни ракописи и ретка периодика составена од весници и списанија преку кои во минатото се изразувала македонската национална мисла со прашања и за македонската култура, од следната академска година поопстојно ќе може да се презентираат пред странските македонисти и слависти, во соработка со странски универзитети.

Ова, меѓу другото, било договорено на работна средба меѓу директорката на Меѓународниот семинар за македонски јазик, литература и култура при Универзитетот „Св. Кирил и Методиј“ во Скопје (МСМЈЛК при УКИМ), проф. д-р Весна Мојсова-Чепишевска и директорката на Националната и универзитетска библиотека „Св. Климент Охридски“ (НУБ), Јелисавета Костадинова.

Засилено ќе се соработува и во промоцијата и афирмацијата на остварувањата на македонистичката научна и истражувачка мисла, вклучително и преку подготовка на библиографии. Странските македонисти, за истражувачки цели, без надоместок ќе можат да зајмуваат библиотечен материјал и да го користат библиотечниот работен простор во читалниците, во текот на нивните студиски и истражувачки престои во земјата.

Таа нагласува и дека воопшто соработката со НУБ, како институција којашто е еден од трезорите на нашата научна мисла и на нашата книжевност, но и на повеќе сегменти на севкупната македонска култура ќе биде значајна во остварувањето на натамошните програмски активности со што ќе се зголемува опфатот на материјали, информации и настани како за лекторатите по македонски јазик, така и за другите образовни и научни центри на коишто се изучува македонистиката.

Директорката на НУБ, Костадинова, пак, напоменува дека со планираните заеднички активности со МСМЈЛК при УКИМ и ќе се засили остварувањето на определбата на НУБ за промовирање и афирмирање на културното наследство коешто е во нејзина надлежност, но и за остварување на влогот со библиотечните истражувања на НУБ.

-Нè радува што преку оваа соработка, меѓу другото, со едукативни работилници, презентации и предавања ќе оствариме и дополнителен придонес за културолошки и историски значајниот библиотечен материјал којшто е дел од нашиот фонд уште повеќе да биде предмет на интерес на странски истражувачи и научници. Со настаните коишто би ги организирале заеднички со МСМЈЛК при УКИМ ќе може уште повеќе да се засилат активностите и за меѓународна референтност на дел од библиотечните истражувања коишто ги спроведуваме. Во тој контекст се и библиографиите и драго ни е што веќе започнуваме со библиографијата на трудовите од Меѓународната научна конференција, затоа што е меѓународен македонистички научен настан со најдолга традиција и со најголем број учесници од странство. Се надеваме дека оваа библиографија ќе се најде на полиците и во електронските бази и на библиотеките низ светот, како клучен изворник на референци и за нови истражувања од областа на македонистиката и за новите генерации странски македонисти, нагласува Костадинова. 

На средбата било посочено дека е многу важно што сите достапни научни трудови од досегашните изданија на Меѓународната научна конференција на МСМЈЛК при УКИМ ќе бидат опфатени и во библиотечните онлајн-бази, со што информациите за нив ќе бидат постојано достапни за сите истражувачи од светот коишто се интересираат за македонскиот јазик, литература и култура.            

Во функција на поддршка на истражувачката активност на странските македонисти се и договорените нови можности за користење на фондот на НУБ за потребите на нивните истражувања.

Мојсова-Чепишевска и Костадинова изразуваат взаемна цврста решеност во следниот период интензивно да се работи на планираните активности коишто не се само продлабочување на соработката, туку се и влог во македонистиката и нејзиниот развој во земјата и во светот. сст/цр