Скопје, 30 август 2022 (МИА) - Во Министерството за финансии денеска ќе биде потпишан амандман на Договорот за грант за партнерство за развој помеѓу САД и Република Северна Македонија. Амандманот ќе го потпишат министерот за финансии Фатмир Бесими и директорката на УСАИД во РС Македонија Џери Дајбл, а ќе присуствува и амбасадорката на САД во земјава Кејт Мари Брнз. Петгодишниот Договор, потпишан во мај  лани, предвидува поддршка за постигнување три развојни цели: за зајакната економска конкурентност, зголемен придонес на младите во општеството и намалена корупција. Според Договорот, за зајакната економска конкурентност, предвидено е Владата на САД да соработува со приватниот сектор за стимулирање на економската конкурентност и изнаоѓање иновативни решенија за поттикнување на регионалната интеграција. Предвидени се и активности за  поддршка на енергетскиот сектор на Северна Македонија, со цел да се подобри безбедноста, сигурноста и самостојноста на енергетскиот систем преку правна и пазарно ориентирана реформа и пристап до западни инвестиции и технологија. Исто така, и зголемен придонес на младите во општеството преку активности насочени кон поддршка на економските можности привлечни за младите, како и активности што ќе ги поддржат владините институции, приватниот сектор, граѓанското општество и граѓаните во борбата против корупцијата.лв/мд/