Скопје, 4 август 2023 (МИА) - Повторно е во функција кујната во детското одморалиште во Охрид каде беа уништени повеќе од 200 килограми храна поради пријавено труење.

Акцијата, како што вели за МИА директорот на Агенцијата за храна и ветеринарство (АХВ) Николче Бабовски, се спроведувала од 18 до 21 јули.

-Уништивме млечни производи, преработки од месо, риба,..., буквално се што најдовме што не беше безбедно. Утврдена беше контаминација со бактерии, и на површините и кај вработените. Кујната беше затворена веднаш, уште на 18 јули. Недоследностите се отстранети и кујната во одморалиштето е повторно во функција, а против економскиот оператор ќе следи соодветна постапка, информира Бабовски. 

Во разговор за МИА што беше објавен деновиве, директорот откри и дека од почетокот на годинава досега, преку епидемиолошката служба од центрите за јавно здравје, пријавени се и спроведени истраги за пет случаи на сомнеж за труење со храна. Врз основа на спроведените инспекциски контроли, пак, утврдена е поврзаност на труење со храна во ресторан (изолирана бактерија салмонела во храна) за што на операторот му е изречена казнена мерка - глоба. Поради нехигиена и утврдено присуство на контактни површини, предмети и материјали кои доаѓаат во контакт со храна, изречени се казнени мерки на градинка од внатрешноста, иако од страна на епидемиолог не е докажан причинител на труење со храна. Присуство на бактерија стафилокока во брис од раце кај вработен и во примерок од храна е причина за потврдено труење со храна во скопски ресторан и против операторот е изречена казнена мерка - глоба. мч/бак/

фото: МИА архива