Прилеп, 25 ноември 2022 (МИА) - Прилепската болница го санира големиот дефект на водоводната мрежа за да се стави во функција котларницата и да профункционира грејниот систем во оваа здравствена установа, информираат од Болницата, која две недели го оспособува водоводниот систем кој не претрпел обнова 40-тина години. Водоводниот систем влијае на функционирањето на котларницата за да функционира системот за греење.

Според Кети Смилеска, директор на Прилепската болница со проширена надлежност, сега се тестира системот и работите треба да завршат викендов. Таа информира дека болницата има доволно мазут за грејната сезона. Уверуваат дека во меѓувреме пациентите не се во опасност и се во простории каде има дополнително вклучени греји тела.

- Нема проблем за пациентите во болницата. Тие се во простории каде вообичаено има вклучено дополнителни грејни тела. Потребно му е време на грејниот систем да функционира. Очекуваме дека до крајот на викендов се ќе биде во ред, изјави Смилеска.

Проблемот со дефектот во водоводната мрежа е две недели и викендов ќе заврши, сметаат од Болницата. Информираат дека има доволно набавено мазут за грејната сезона.

- Уште во летниот период во два наврата, набавивме 20 и 35 тони мазут, вкупно 55 тони, доволно за загревањето на просториите на болницата за наредниот период, до февруари. Во моментов во Болницата има дополнителни грејни тела и ниту еден пациент не се наоѓа во просторија која не е затоплена. Сите пациенти се во просториите каде има дополнително греење. Болницата ќе набави уште 25 тони мазут, постапката е во тек и со вкупно 75 тони мазут ќе биде доволно за целата грејна сезона, рече Смилеска.

Во Здравствениот дом каде загревањето е со нафта, има за неколку дена, иако таму сметаат дека радијаторите се ладни. Во тек е набавката на нови количества, велат од болницата.

Ситуацијата со корона вирусот е стабилна. Во инфективното е хоспитализиран еден пациент. ем/мд/