Скопје, 17 септември 2025

Во изминатиот период Општина Илинден изврши реновирање на домовите на култура во населените места Бујковци, Бучинци, Ајватовци и Дељадровци. Овие културни објекти, кои се од особена важност за жителите на општината, добија целосно обновен лик и значително подобрена функционалност, се вели во соопштението од Општина Илинден. 

Во рамки на реновирањето беше опфатено бојадисување на внатрешните и надворешните ѕидови, замена на старите и дотрајани врати и прозорци, менување на постоечката кровна конструкција, како и изведување на други занаетчиски работи.

Реновирањето продолжува и во другите населени места во рамки на општината. Градоначалникот Александар Георгиевски изврши увид во објектите, нагласувајќи дека целта е да се унапреди културниот живот на локално ниво преку создавање современи и пријатни простори за уметничко изразување, дружење и активно граѓанско учество.

Домовите на култура, не се само места за културни настани, туку вистински центри за социјална интеракција и креативност, отворени за сите генерации. Посебен акцент се става на создавањето услови за младите, но и за повозрасните жители, кои со овие реновирани објекти добиваат простор каде можат квалитетно да го поминуваат слободното време.

Со оваа иницијатива, Општина Илинден прави значаен чекор напред во зајакнување на културниот и општествениот живот, градејќи визија за заедница во која културата, креативноста и соработката се во центарот на вниманието.

Општина Илинден

Фото: Општина Илинден