Вашингтон, 18 јануари 2024 (МИА) Заменикот генерален секретар на ОН, Мартин Грифитс, повика да се соберат 4.2 милијарди долари хуманитарна помош за настраданото од војна население на Украина, како и за украинските бегалци и заедниците во регионот кои ги примаат тие бегалци. 

Според него, таква помош годинава ќе биде потребна за 40 отсто од населението на Украина. 

-Идниот месец ќе настапи третата година од оваа сеопфатна војна и окупација, изјави Грифитс, кој е заменик на генералниот секретар по хуманитарните прашања и координира итна помош. 

Тој истакна дека иако војната во источна Украина започна пред десет години, „ескалацијата во 2022 година придонесе кон сосема ново ниво на смрт, деструкција и очај, и исто така, конечно, поток од бегалци“. 

Според ОН, во војната што започна на 24 фебруари 2022 година со руската инвазија на Украина, досега загинале најмалаку 10.000 мирни жители, вклучително и 560 деца, а повеќе од 18.500 луѓе се ранети. Околу четири милиони Украинци се внатрешно раселени, а околу 6.3 милиони се бегалци кои заминале во соседните европски земји. 

Според Грифитс, годинава помош им е потребна на 14.6 милиони луѓе „или цели 40 отсто од населението на Украина“ како и милиони бегалци кои живеат во 11 земји од регионот. кб/