Скопје, 14 декември 2024 (МИА) - Регионална тинк-тенк конференција насловена „Да ја сочуваме демократијата: Соочување со подемот на десниот популизам“, денека и утре ќе се одржува во Скопје, во организација на Прогрес Институт за социјална демократија со поддршка од Фондацијата Калеви Сорса од Финска. 

Целта на настанот, како што велат организаторите, е да ги собере креаторите на политики, академската заедница, актерите на граѓанското општество и останати засегнати страни да ги истражат изворите и динамиката на десниот популизам.

Во рамки на панел дискусиите ќе се анализираат политичките, општествените и економските фактори кои го поттикнуваат подемот на десниот популизам, како и неговото влијание врз демократските институции и владеењето на правото. Целта е, исто така, да се предложат ефективни стратегии за заштита на демократијата.

На настанот ќе е обратат Марко Михаилоски, извршен директор на Прогрес Институт и Јелена Симиќ проектна менаџерка во Фондацијата Калеви Сорса.

На првата панел-дискусија „Политичката динамика на десничарскиот популизам во Европа и Западен Балкан“ учество ќе земат проф. д-р Јаник Лахти од Финска, претседателката на мрежата за родова еднаквост на ЦИЕ Хрватска Даша Силовиќ и уредникот за надворешна политика на телевизија 24 Сеад Ризвановиќ. 

На вториот панел „Популизам vs. Демократија: Ерозија на институциите и владеењето на правото“ ќе говорат поранешната судијка на Европскиот суд за човекови права во Стразбур Маргарита Цаца Николовска, претседателот на Центарот за модерни вештини од Србија Милош Џајиќ и експертот за социјални прашања Душан Томшиќ. 

На третата панел дискусија „Улогата на социјалните медиуми и лажните вести во зајакнувањето на популистичките наративи“ ќе говорат главниот и одговорен уредник на Вистиномер Владимир Петрески, специјалистот за комуникации Марјан Забрчанец, пратеничката во Парламентот на Финска Пинја Перхолехто, како и пратеничката во македонското собрание Славјанка Петровска. 

Утре, на последниот панел насловен „Градење на коалиции: Јакнење на соработката помеѓу граѓанското општество и политичките актери“ предвидено е учество на заменик претседателката на СДСМ Фани Карафилова Пановска, пратеничката од Босна и Херцеговина Лана Прлиќ, потпретседателката на Европската мрежа против сиромаштија Билјана Дуковска и меѓународната секретарка на СДП Хрватска Каролина Леаковиќ. дма/нд/

Фото: Скриншот