Дебар, 25 септември 2025 (МИА) - Манастирот „Свети Георгиј Победоносец“, во дебарското село Рајчица, подготвен е за одбележување на втората манастирската слава, Воздвижението на чесниот и животворен Крст Господов – Крстовден и ги кани верниците на одбележување на славата.

Одбележувањето почнува утревечер, 26 септември, во предвечерието на празникот, со свечена и празнична вечерна богослужба во 18 часот, која ќе ја служи епископот Антаниски г. Партениј. На крајот на богослужбата, проследен од стиховите на празничниот тропар, ќе биде изнесен на вход крстот со честичка од Чесното Дрво и потоа повторно ќе биде внесен во олтарот, објави Бигорски манастир.

Следниот ден, 27 септември (сабота) во 7:30 часот ќе започне Утрената богослужба. На крајот од Утрената, од светиот Престол, од олтарот, ќе биде изнесен сребрениот филигрански крст, а кој преку годината се чува во големиот кивот на Бигорскиот манастир. После чинот на Воздвижението на крстот, на верниците ќе им се даде можност и да се поклонат пред Живоносното и спасително Дрво на Господ Исус Христос.

Во 9 часот почнува Светата архиерејска Златоустова Литургија, со која ќе чиноначалствува Неговото Преосвештенство Епископот Антаниски г. Партениј.

-Дојдете сите заедно победнички да го издигнеме Чесниот Крст на нашиот Спасител, Господ Исус Христос, нашето оружје и нашата надеж за спасение, и откако ќе го прославиме, радосно да се причестиме со светите Христови Тајни, се наведува во објавата.

Манастирот „Св. Георгиј Победоносец“ е женски манастир и се наоѓа на околу два километра оддалеченост од Дебар. На одбележувањето, традиционално се очекува присуство на голем број верници од повеќе градови од државава, како и поранешни жители на Рајчица и нивни потомци, кои сега живеат во Дебар. вт/ев/

Фото: Бигорски манастир