Рига, 8 јули 2023 (МИА) – Едгарс Ринкевичс денеска во Рига положи заклетва како претседател на Летонија. Тој од 2011 година ја извршуваше функцијата министер за надворешни работи.

Со тоа Летонија го доби првиот геј претседател. Ринкевичс (49) првпат призна дека е геј во 2014 година и оттогаш се залага за ЛГБТ правата. Хомосексуалните бракови во Летонија се нелегални, иако Уставниот суд минатата година ги призна истополовите заедници.

Парламентот на Летонија во мај го избра Ринкевичс за претседател на земјата во третиот круг на гласање. Претседателот на Летонија има церемонијална позиција, но може да стави вето на законите и да распише референдуми.

Ринкевичс во својот инаугуративен говор вети дека ќе продолжи да ја поддржува Украина во војната против Русија. Тој рече дека надворешната политика на Летонија „нема време за грешки“, додавајќи дека ќе дејствува „брзо, одлучно и мудро“.

Тој вети дека ќе се залага за „создавање на модерна и силна Летонија, за легална и праведна Летонија, за благосостојбата на луѓето, за инклузивно општество полно со почит“.

Ринкевичс ја презема функцијата од Егилс Левитс, кој беше претседател четири години. ми/

фото: ЕПА